Gagnvirk margmiðlun á grunnsýningunni
Margmiðlun er nýstárleg leið til miðlunar og gefur möguleika á að miðla menningarsögunni á fjölbreyttari og oft ítarlegri máta en hægt er að gera eingöngu með gripum. Eins nýtist margmiðlun vel til að dýpka sýnina, brúa bilið þar sem tíminn hefur ekki skilið eftir áþreifanlegar minjar og skapa þannig frekari samfellu í sýningunni. Margmiðlun gegnir veigamiklu hlutverki á grunnsýningunni. Settir hafa verið upp tólf snertiskjáir með aðgengilegu viðmóti í sýningarsölunum. Þar ræður notandinn ferðinni, hann ákveður hversu djúpt er kafað í efnið, hversu oft hann skoðar það og hversu lengi hann dvelur við hverja kynningu. Þetta þýðir að hver gestur mótar upplifun sína af sýningunni og því verður reynsla hans einstök. Það hefur sýnt sig að oft situr meira eftir þegar fólk tekur virkan þátt, upplifunin verður eftirminnileg og hefur meira fræðslugildi.
Margmiðlunarkynningar á grunnsýningunni
Tímabilið frá upphafi Íslandsbyggðar fram um siðaskipti
- Uppruni Íslendinga
DNA-rannsóknir á erfðaefni geta gefið verðmætar upplýsingar um uppruna landnámsmanna. Hér er gerð grein fyrir rannsókn sem stendur yfir og þeim ályktunum sem draga má af henni.
- Landnámabók
Fjallað er um frásagnir Landnámabókar og fleiri heimilda um byggingu landsins.
- Húsakostur til 1500
Kynning á húsagerð og húsakynnum sem fyrstu kynslóðir Íslendinga bjuggu í.
- Kuml á Íslandi
Grafir heiðinna manna eru meðal verðmætustu heimilda um lifnaðarhætti fyrstu aldanna því að skart og nytjahlutir voru lagðir í grafir. Kuml frá Baldursheimi í Mývatnssveit er hér í brennidepli.
- Þing, goðar, þjóðveldi
Íslenska þjóðveldið, 930-1262, hafði ákveðna stjórnskipan. Þeirri sögu er betur komið á framfæri með skýringarmyndum en safngripum.
- Kristnitaka
Kristnitakan er meginatriði í Íslandssögunni, en fáir safngripir minna á hana. Hins vegar eru til frásagnir af því hvernig heiðni var aflögð og kristni tekin á Íslandi um 1000.
- Sturlungaöld
Lokaskeið þjóðveldisins á 13. öld einkenndist af ófriði milli höfðingja af fáum en voldugum ættum. Hér er gerð grein fyrir þessum innanlandsátökum á árunum 1220-1262 sem leiddu til þess að Íslendingar gengu Noregskonungi á hönd.
- Undir erlendu valdi
Í framhaldi af fræðslu um stjórnskipun þjóðveldisins er gerð grein fyrir stöðu Íslands og stjórnkerfi þess innan ríkja konunga Norðmanna og síðar Dana.
- Ritlist á miðöldum
Fjallað er um ritun á miðöldum og íslenskar miðaldabókmenntir, bókmenntaarf sem hefur víða skírskotun til miðaldamenningarinnar utan Íslands.
- Siðbreytingin á Íslandi
Siðbreytingin frá kaþólsku til lútherstrúar árið 1550 skiptir miklu máli í þjóðarsögunni. Af þessum átökum og baráttu Jóns Arasonar Hólabiskups er til viðburðarík saga.
Tímabilið frá siðaskiptum til samtímans
- Manntalið 1703
Almennt manntal var gert á Íslandi árið 1703 og má kallast fyrsta þjóðarmanntalið í heiminum sem varðveist hefur. Í það má sækja miklar upplýsingar um landsmenn og hagi þeirra sem og lýðfræði Íslands almennt.
- Úr torfi í steinhús
Húsagerð Íslendinga hefur tekið breytingum og þróast frá lokum miðalda og fram á 20. öld. Híbýli andsmanna voru lengst af úr torfi, timbri og steini.
- Móðuharðindin
Skaftáreldar 1784 og harðindin sem fylgdu í kjölfarið voru afdrifaríkir atburðir. Skaftáreldar voru eitt mesta eldgos á byggðu bóli á sögulegum tíma og fylgdi gífurleg hungursneyð í kjölfarið.
- Þjóðríkismyndun
Myndun þjóðríkis á Íslandi á 19. og 20. öld. Hér er sýnt hvernig ríkisvaldið fluttist smám saman til Íslands á tíma sjálfstæðisbaráttunnar.
- Sigurður málari
Merkur fjöllistamaður á seinni hluta 19. aldar. Hann var áhrifamikill í þjóðlegum listum og fræðum og frumkvöðull að stofnun Þjóðminjasafns Íslands árið 1863.
