Framhaldsskólar

Fræðsla fyrir framhaldsskóla

18.7.2016

Safnfræðsla fyrir framhaldsskólahópa felur í sér leiðsagnir um grunnsýningar Þjóðminjasafnsins og Safnahússins út frá ólíkum sjónarhornum sem henta mismunandi fögum eða áföngum.

Einnig geta kennarar á framhaldsskólastigi komið með nemendur á eigin vegum á sýningar Þjóðminjasafnsins á Suðurgötu og í Safnahúsinu við Hverfisgötu.  Kennarar mega einnig senda nemendur á sýningar á eigin vegum til þess að vinna fyrir fram skilgreind verkefni sem þeir standa skil á gagnvart kennara.

Vinsamlega sendið beiðni um bókun á netfangið kennsla@thjodminjasafn.is eða hafið samband í síma 5302255 eða 5302254.

Leiðsagnir í Þjóðminjasafni eru sniðnar að óskum kennara og hafa eftirtaldar nálganir á efni sýninganna mótast undanfarin ár:

Þjóð í mótun. Grunnsýning, tímabilið 800-1600

Farið er yfir fyrri helming grunnsýningar safnsins, þar sem fjallað er um sögu Íslandsbyggðar frá landnámi og fram yfir siðaskipti. 

Leiðin til samtímans. Grunnsýning, tímabilið 1600-2000

Seinni hluti grunnsýningar safnsins er kannaður, þar sem fjallað er um sögu Íslandsbyggðar frá siðaskiptum til nútímans.

Lífgað upp á hvunndaginn: Listir og handverk fyrri alda

Grunnsýning safnsins er rannsökuð með sérstakri áherslu á handverk og listir. Skoðaðir eru kirkjugripir, nytjagripir og listgripir á sýningunni og þeir settir í samhengi með tilliti til samfélagsgerðar hverju sinni. 

Stakkur eftir vexti: Tíska og textílar

Víða á grunnsýningu safnsins má sjá muni og myndir sem varpa ljósi á fatnað og tísku fyrri alda. Skoðaðar eru textílleifar, skartgripir, myndir og minningartöflur sem gefa innsýn í efni og útlit fatnaðar fyrri alda. Tískustraumar frá Evrópu höfðu áhrif á fatagerð hér á landi þó sum stílbrigði megi telja séríslensk. Þróun íslenskra kvenbúninga verður sérstaklega höfð að leiðarljósi sé þess óskað.

Frá rúnaristum til ritvéla: Íslensk bókmenntasaga

Gengið er um grunnsýningu safnsins með áherslu á gripi sem tengjast íslenskri bókmenntasögu frá upphafi Íslandsbyggðar til nútímans.

Almenn leiðsögn. Grunnsýningin; Þjóð verður til 

Almenn leiðsögn um grunnsýningu Þjóðminjasafnsins, Þjóð verður til, er ávallt í boði fyrir alla aldurshópa.

Leiðsagnir um sérsýningar

Í Þjóðminjasafni Íslands og í Safnahúsinu við Hverfisgötu eru ætíð fjölbreyttar sérsýningar sem standa yfir í mislangan tíma. Kennarar eru hvattir til að kynna sér efni sérsýninga hér: Sérsýningar/sýningar í gangi.

Safnkennarar veita gjarnan leiðsögn um sérsýningar í samvinnu við kennara.

Safnfræðsla fyrir framhaldsskóla í Safnahúsinu

Eitt af meginmarkmiðum grunnsýningar Safnahússins við Hverfisgötu, Sjónarhorna, er að hún nýtist nemendum til að upplifa og rýna í íslenskan myndheim. Sýningin nýtist einkum í greinum sem tengjast sögu, myndlist, listfræði og hönnun. Hægt er að tengja saman heimsókn í Þjóðminjasafnið á Suðurgötu og í Safnahúsið við Hverfisgötu og dýpka þannig skilning og auðga reynslu nemenda af íslenskri menningarsögu. 

Ólík sjónarhorn

Í risi Safnahússins, á 4. hæð, er sýningarhluti sem kallast Niður og fjallar um hvernig fólk horfir niður á landið undir fótum sér.

Í sýningarýminu Niður eru fjögur verk sem fjallað er um út frá ólíkum sjónarhornum. Markmið verkefnisins er að nemendur gangi um salinn og skoði þessi fjögur verk sérstaklega. Því næst velja nemendur sér eitt þessara verka til að fjalla um. 

Upplýsingar fyrir kennara - Ólík sjónarhorn

Verkefni - Ólík sjónarhorn