Grunnskólar

5.-6. bekkur í Þjóðminjasafni á Suðurgötu

Í spor landnámsfólksins: Upphaf Íslandsbyggðar

Í heimsókninni er fjallað um landnámið og skoðaðar fornleifar frá fyrstu öldum byggðar á Íslandi. Þjóðminjasafnið nýtur þeirrar sérstöðu skv. lögum að bera ábyrgð á varðveislu allra jarðfundinna gripa. Nemendur klæðast landnámsbúningum sem merktir eru nöfnum úr Landnámu meðan á heimsókninni stendur. 

Markmið: 

  • Að nemendur þekki gripi og fornleifar sem varðveist hafa frá landnámsöld.
  • Að nemendur geti sett sig í spor landnámsfólksins.
  • Að nemendur öðlist skynbragð á trú og siði fyrir kristnitöku. 
  • Að nemendur fái tilfinningu fyrir sögulegum minjum og frumheimildum af ólíku tagi.

 Fyrirkomulag heimsóknar:

Tekið er á móti hópnum í anddyri safnsins. Nemendur hengja upp útifatnað í fatahengi í kjallara og setjast á bekk í anddyri þar sem safnkennari býður þá velkomna. Hann kynnir dagskrá heimsóknarinnar og fer yfir þær reglur sem gilda á safni. Gengið er upp í kennslustofu þar sem safnkennari ræðir landnámið og það sem einkenndi þetta tímabil í sögunni. Eftirgerðir af gripum frá tímabilinu eru látnar ganga, nemendur klæðast búningum landnámstímans og fá um leið nafn landnámsmanns eða -konu. Síðan er gengið að viðkomandi tímahólfi grunnsýningar safnsins og gripir sýningarinnar skoðaðir. Áður en snúið er aftur í kennslustofuna gefst kennurum tækifæri til að taka hópmynd af bekknum í tröppunum við innganginn að sýningunni. Að lokum er haldið inn í kennslustofuna aftur þar sem nemendur ganga frá búningum og fá afhent nafnspjald með sínu Landnámunafni.

Mynd-1

Heimsóknin tekur um 1 klst. og 15 mínútur.

Vinsamlegast sendið beiðni um bókun á netfangið kennsla@thjodminjasafn.is eða hafið samband í síma 5302255 eða 5302254.