Leikskólar

Leikskólanemendur

Þjóðminjasafn – hvað er það?

4.5.2016

Leitast er við að gera safnheimsóknina að skemmtilegri og ævintýralegri upplifun. 

 Markmið heimsóknar

  • Að börnin kynnist hugtökunum safn og sýning
  • Að börnin upplifi Þjóðminjasafnið sem áhugaverðan stað til að heimsækja
  • Að börnin tengi gripi í safninu við daglegt líf

 Fyrirkomulag heimsóknar

Tekið er á móti hópnum í anddyri safnsins. Börnin hengja upp útifatnað í fatahengi í kjallara. Það er mælt með því að börnin séu áfram í skóm. Hópurinn sest á bekk í anddyri þar sem safnkennari býður börnin velkomin. Hann kynnir fyrir þeim dagskrá heimsóknarinnar og veltir upp ýmsum spurningum eins og hvað sé eiginlega geymt í Þjóðminjasafninu.

Safnkennarinn leiðir hópinn um grunnsýningu safnsins, Þjóð verður til, þar sem ýmsa forvitnilega gripi er að sjá. Sumum gripum á safninu fylgja ævintýralegar sögur sem börnunum eru sagðar. Styttum og líkneskjum á sýningunni er gefinn sérstakur gaumur.

Í lok heimsóknar fylgir safnkennari hópnum inn í Skemmtimennt þar sem börnin mega leika sér og aðrar reglur gilda en inni á sjálfri sýningunni. Í Skemmtimennt má snerta allt og þar má fara í búninga, teikna, skoða bók og fleira. Þar kveður safnkennari hópinn og afhendir myndaspjöld.

Heimsóknin tekur um 45-60 mínútur. Dagskráin er ætluð 4 - 5 ára börnum. Æskilegt er að ekki séu fleiri en 15 börn í hverjum hópi til þess að þau njóti heimsóknarinnar sem best.

Vinsamlegast sendið beiðni um bókun á netfangið kennsla@thjodminjasafn.is eða hafið samband í síma 5302255 eða 5302254.