Rannsóknir
Fornleifarannsóknir
Allt frá stofnun Þjóðminjasafns Íslands árið 1863 hafa fornleifarannsóknir verið mikilvægur þáttur í starfseminni. Lengst af var safnið eini rannsóknaraðili landsins á sviði fornleifafræði. Auk eigin rannsókna bar því jafnframt skylda til að sinna öllum óvæntum fornleifafundum sem í ljós komu við verklegar framkvæmdir eða vegna uppblásturs eða landbrots. Þjóðminjasafnið sinnti einnig stjórnsýsluhlutverki á sviði fornminjavörslu og fornleifadeild safnsins, sem stofnuð var árið 1985, var þannig umsagnaraðili varðandi fornleifar í sambandi við mat á umhverfisáhrifum og skipulagsmálum fram til ársins 2001.
Með þjóðminjalögum nr. 107/2001 varð grundallarbreyting á hlutverki Þjóðminjasafnsins. Þá var stjórnsýsluhlutverk safnsins, varðandi umsjón og eftirlit með fornleifum og leyfisveitingar til fornleifarannsókna, fært yfir í nýstofnaða Fornleifavernd ríkisins.
Uppgraftarverkefnum á vegum Þjóðminjasafnsins hefur því fækkað mjög mikið á undanförnum árum og er það nú fyrst og fremst rannsóknar- og fræðslustofnun, auk þess að vera í samstarfi við ýmsa innlenda og erlenda rannsóknaraðila um rannsóknarverkefni. Megináhersla er því lögð á móttöku og varðveislu forngripa, úrvinnslu á eldri rannsóknum og að miðla upplýsingum um þær.
Í heimildasafni Þjóðminjasafnsins eru varðveitt rannsóknargögn úr íslenskum fornleifarannsóknum í nær 150 ár, eins og teikningar, dagbækur, skýrslur og ljósmyndir.
Hér er hægt að nálgast skýrslur um fjölmargar fornleifarannsóknir sem gerðar hafa verið á vegum Þjóðminjasafnsins frá um 1970. Upplýsingar um eldri rannsóknir munu innan skamms verða gerðar aðgengilegar hér á heimasíðu Þjóðminjasafnsins og á netinu á heimasíðu Sarps.
Vinsamlega athugið að frekari vinna varðandi fornleifar stendur núna yfir á vefsíðunni - takk fyrir þolinmæðina!
