Húsin, kort
Glaumbær í Skagafirði
Glaumbær er fornt höfuðból, og þar hafa búið miklir og ríkir höfðingjar. Sá nafntogaðasti þeirra er líklega Teitur Þorleifsson lögmaður (d. 1537). Prestar hafa setið í Glaumbæ frá árinu 1550. Í Glaumbæ er stór torfbær af norðlenskri gerð. Höfundar allra bæjarhúsanna eru ekki þekktir, en sr. Jón Hallsson (1809-94) prófastur lét reisa framhúsin og baðstofuna, sem er öftust bæjarhúsa, á árunum 1876-79.
Alls eru húsin 14 að tölu og þar af 6 í framhúsaröð. Engin útihús hafa varðveist.
Búið var í bænum til ársins 1947 og sama ár var hann tekinn í vörslu Þjóðminjasafnsins. Strax var ráðist í töluverðar viðgerðir á húsunum. Byggðasafn Skagfirðinga var formlega stofnað árið 1948 og hefur haft afnot af Glaumbæ síðan þá.Undanfarin ár hefur mikið verið gert við einstök hús, en eins og gengur um torfbæi þarf að halda þeim við reglulega til þess að koma í veg fyrir umfangsmiklar skemmdir.
Í bænum er elsta sýning Byggðasafns Skagfirðinga til húsa. Sýningin heitir „Mannlíf í torfbæjum" og þar er reynt að að koma öllu fyrir með svipuðu móti og gerðist á myndarheimilum á 19. öld. Tvö 19. aldar timburhús, svokallað Áshús og Gilsstofa, hafa verið flutt að Glaumbæ og eru notuð í þágu Byggðasafnsins.
Glaumbær, bakhlið
Glaumbær, baðstofuloft
Glaumbær, norðurstofa
