Skrá 80a. Greiðasala í sveitum

FYRIRSPURN UM GREIÐASÖLU Í SVEITUM
Hér er leitað eftir upplýsingum um hvar í sveitum var hægt að fá keypta gistingu og veitingar á fyrri hluta aldarinnar. Á hvaða bæjum í nágrenni heimildarmanna var slík starfsemi rækt? Hvaða fólk rak þjónustuna? Vel eru þegin nöfn á fólki sem bjó á þessum stöðum, eða kom þangað og vann, og hugsanlega væri hægt að fá upplýsingar hjá. Þeir sem þekkja til eru beðnir að svara eftirfarandi spurningum.

Var greiðasalan í íbúðarhúsi eða var sérstakt húsnæði fyrir hana? Voru bæði gisting og veitingar til sölu eða aðeins annað hvort? Hvernig var pantað? Hvað gátu margir verið í einu í gistingu og/eða mat? Var boðið upp á þjónustu allan daginn eða aðeins á sérstökum tímum? Lýsið gistiherbergjunum. Voru sérstök rúmföt ætluð á þau? Var boðið upp á þjónustu varðandi t.d. þvott á fötum eða skóburstun? Komu gestir einkum til að hvíla sig og skemmta sér eða var þarna áfangastaður fyrir fólk á ferðalögum eða í veiðiskap? Hvernig komu gestirnir?

Var sérstök ráðskona eða sá húsfreyja um matseld bæði fyrir heimili og veitingasölu? Var ráðið starfsfólk til annarra starfa en matreiðslu? Hvaða starfa, ef svo var? Segið frá eldunaraðstöðu. Fengu gestir sama mat og heimafólk eða var eldað sérstaklega fyrir þá? Hver var í stórum dráttum munurinn á mat gesta og heimamanna ef hann var á annað borð? Hvernig var borðhaldi háttað? Var margréttað? Borðuðu gestir með heimafólki eða sér? Hvernig var lagt á borð fyrir gesti (borðbúnaður, dúkar, munnþurrkur, blóm, t.d.)? Höfðu menn áfengi um hönd, t.d. með mat?

Var eitthvað sérstakt (t.d. í náttúru eða mannlífi) sem gaf staðnum gildi? Var gestum boðið upp á veiði, skoðunarferðir, útreiðar, böð, böll, menningarefni eða annað? Þjóðháttadeild þiggur með þökkum sögur af sérstökum atburðum, vísur eða gamlar ljósmyndir sem efninu tengjast.

Prentvæn útgáfa