Varðveislu- og rannsóknasetur tilnefnt til Íslensku safnaverðlaunanna
Varðveislu- og rannsóknasetur Þjóðminjasafns Íslands tilnefnt til Íslensku safnaverðlaunanna 2018
Tilkynnt hefur verið um tilnefningar til Íslensku safnaverðlaunanna 2018. Tilnefnd eru Grasagarðurinn í Reykjavík, Listasafn Árnesinga og nýtt varðveislu- og rannsóknarsetur Þjóðminjasafns Íslands.
Í rökstuðningi valnefndar kemur fram að „varðveislu- og rannsóknasetur Þjóðminjasafns Íslands muni hafa afgerandi áhrif á fagleg vinnubrögð starfsmanna safna um allt land. Með því er tónninn gefinn fyrir framtíðarvarðveislu þjóðargersema.“
Tilkynnt verður um sigurvegara 5. júní nk. á Bessastöðum.
Íslensku safnaverðlaunin
Íslensku safnaverðlaunin eru veitt annað hvert ár og er ætlað að vekja athygli á því sem vel er gert á íslenskum söfnum. Þeim er jafnframt ætlað að efla faglegan metnað og vera hvatning til að kynna menningu þjóðarinnar á framsækinn og áhugaverðan hátt. Að Safnaverðlaununum standa Íslandsdeild ICOM og Félag íslenskra safna og safnamanna (FÍSOS).
Verðlaunin eru veitt einu safni sem þykir hafa skarað fram úr og vera til eftirbreytni. Ekki er gerður greinarmunur á tegundum safna og koma því öll söfn á landinu til greina; minja- og byggðasöfn, listasöfn, náttúrugripasöfn og önnur sérsöfn.
Safnverðlaunin voru fyrst veitt árið 2000. Valnefnd skipuð fulltrúum félaganna og fulltrúa frá safninu sem síðast hlaut verðlaunin velur úr innsendum hugmyndum en óskað er eftir tillögum frá almenningi jafnt sem fagmönnum. Viðurkenningin sem felst í verðlaununum er bæði heiður og hvatning söfnunum þrem sem hljóta tilnefningu ekki síður en því safni sem hlýtur verðlaunin.