Fyrirlestur: Byggt yfir hugsjónir í Breiðholti
Hádegisfyrirlestur Þjóðminjasafns Íslands
Þriðjudaginn 27. mars kl. 12 flytur Ágústa Kristófersdóttir sagn- og safnfræðingur erindi í fyrirlestrasal Þjóðminjasafnsins. Í erindinu verður sagan á bak við byggingu og skipulag Breiðholtshverfanna rifjuð upp, með sérstakri áherslu á löngu blokkina og Breiðholt III.
Í ljósmyndasal Þjóðminjasafns er sýningin Langa blokkin í Efra Breiðholti, en þar eru sýndar myndir eftir ljósmyndarann David Barreiro. Að fyrirlestri loknum gefst kostur á að skoða sýninguna. Skoðað verður hvað leiddi arkitektana áfram í starfi þeirra við skipulagningu hverfanna og hönnun húsa og lóðanna umhverfis þau. Fjallað verður um hugmyndirnar á bak við skipulagið, útfærsluna og rætt almennt um hverfið – kosti þess og galla.
Fyrstu hugmyndir um byggð í Breiðholti, svæðinu umhverfis Breiðholtsbæinn komu fram í Aðalskipulagi Reykjavíkur 1962-1983. Ástand á húsnæðismarkaði varð til þess að uppbyggingin í Breiðholti mótaðist mjög af tilraunum til heildarlausna á húsnæðisskorti sem hafði verið viðvarandi um langt skeið. Skipulagshöfundar sóttu innblástur og fyrirmyndir til þess sem var að gerast erlendis og reyndu að læra af reynslu annarra, þetta voru hugsjónamenn sem vildu að bæta líf einstaklinga, samfélagið og borgina með skipulaginu. Í erindi sínu mun Ágústa velta fyrir sér útkomunni og hvaða áhrif arkitektúr og skipulag hafa á samfélagið.
Ágústa Kristófersdóttir er sagn- og safnafræðingur. Hún starfaði við rannsóknir á byggingarlist í Listasafni Reykjavíkur og á Árbæjarsafni um síðustu aldamót. Hún vann þá meðal annars sýningu um Breiðholtið sem sett var upp í Listasafni Reykjavíkur. Ágústa var sýningarstjóri Þjóðminjasafn Íslands og síðar framkvæmdastjóri safnaráðs. Frá árinu 2015 hefur hún gegnt stöðu forstöðumanns í Hafnarborg, menningar og listamiðstöð Hafnarfjarðar.
Fyrirlesturinn er fimmti í röð hádegisfyrirlestra Þjóðminjasafnsins vor 2018. Verið öll velkomin.