Hádegisfyrirlestur Þjóðminjasafns Íslands. Fyrsti íslenski fuglaljósmyndarinn
Þriðjudaginn 12. september kl. 12 flytur Kristinn Haukur Skarphéðinsson, dýravistfræðingur hjá Náttúrufræðistofnun Íslands erindi um fyrsta íslenska fuglaljósmyndarann.
Björn Björnsson, kaupmaður á Norðfirði var reynslumikill ljósmyndari þegar hann, fyrstur Íslendinga hóf að mynda fugla af alvöru í kringum 1940. Hann helgaði sig þessari iðju næsta aldarfjórðunginn og náði ágætum myndum af flestum íslenskum varpfuglum. Björn var jafnframt mikill fuglaverndarmaður og bar hag arnarins sérstaklega fyrir brjósti. Í fyrirlestrinum verður brugðið upp úrvali af fuglamyndum sem hann ánafnaði Náttúrufræðistofnun Íslands eftir sinn dag, sagt frá aðferðum Björns við myndatökurnar og gerð grein fyrir þýðingu þeirra í almannafræðslu og fuglavernd þess tíma.
Fyrirlesturinn er fyrsti í röð hádegisfyrirlestra Þjóðminjasafnsins haustið 2017. Allir velkomnir og ókeypis aðgangur.