Þjóðtrú í sambandi við húsagerð

Var höfð ótrú á því að stækka (færa) hús aftur (gafl færður um set)? Átti að leiða af því afturför í búskap? Var þá sambærileg trú um framför í búi, ef hús voru færð (stækkuð) fram? Var trú á því, að viss hússtæði væru lánsöm, öðrum fremur (híbýli manna, peningshús) og því ekki afrækt, ef annars var kostur? Var því trúað, að óheill fylgdi sumum hússtæðum og þau lögð niður vegna þess?
Voru sérstakar venjur viðhafðar, er byggja átti hús á óhreyfðri jörð (stungnir upp þrír kekkir t.d. og svo lagst til svefns, pál eða skóflu e.t.v. stungið þar í jörð og hikað með að hefja verkið)?
Var ekki byrjað á að hlaða hús eða byrjað á húsagerð yfirleitt á mánudegi? Hvað um aðra daga?
Voru steinar klofnir til bygginga með vissu sjávarfalli (útfalli)?
Var gætt að sjávarföllum í sambandi við vegghleðslu (kampar á kvíar, fjárrétt, fjárhús, fjós, undirblástur á eldhús t.d. byggt með aðfalli sjávar)?
Þekktist sú venja, að maður, sem kom þar að, sem verið var að hlaða vegg eða garð, setti þar þrjá hnausa eða steina í hleðslu? Hvað var það þá nefnt (að gjalda torfalögin t.d.)? Voru bein húsdýra lögð í veggi (fjárhúsveggi eða aðra veggi), jafnvel hlaðin heil lög í veggjahluta úr sauðaleggjum? Er nokkur trú þekkt varðandi það?
Skrifið sagnir um óhöpp , er leitt hafa af byggingum, er reistar voru í bannhelgi huldufólks eða vætta.