Að binda sæti, setja í bönd, binda bagga.

Lýsið nákvæmlega verkinu við að binda sæti eða bagga. Minnist m.a. eftirfarandi atriða:
Hvað nefndist verkið við að koma sæti í bönd? Þekktist orðasambandið "að vefja að sátu", um binding heys? Hvað nefndist sá, er verkið vann (bindingsmaður t.d)? Hafði hann hlífðarvettlinga (bindingshanska) á höndum? Vann hann einn að því að binda eða hafði hann aðstoðarmann? Var við það miðað, að bindingsmaður kæmi ákveðnum baggafjölda eða kaplafjölda í bönd á einum bindingsdegi? Lýsið því, a) miðað við að einn ynni verkið, b) miðað við að tveir ynnu saman. Hvorum megin sátunnar stóðu bindingsmaður og aðstoðarmaður hans, er dregið var í hagldir eða bundið bakreipi?
Greinið frá einstökum orðum, sem notuð voru við sjálfa bindinguna (draga í hagldir, stíga sátu, stíga niður, halda við, liggja á, fylgja eftir, snúa við, binda bakreipi, gera af sátu, afgjörð, taka utan af o.s.frv.)? Sendið sýnishorn af hnút á bakreipi ef hægt er (afgjörð, baggahnútur). Við hvað var miðað, ef baggi skyldi vera vel bundinn (þéttleiki, þjöppun heys t.d. og það hvar silinn væri á bagganum, o.s.frv.)? Hvað nefndist laust hey, er lá eftir nýbundinn bagga (baggasafn t.d.)? Var það lagt á næstu sátu og svo koll af kolli, er bundið var? Þekktist það að síðasta baggafang á slætti eða síðasta fang á engi væri skilið eftir (gefið engjunum)? Nefndist það nokkuð? Þekkist nokkur þjóðtrú í sambandi við það?
Var mismunur á bindingu heys, t.d. miðað við þurrhey og votaband?
Var böggum jafnan velt þannig til á teig, að tveir lægju saman til að auðvelda verkið við að setja upp á hest?
Voru mismunandi orð um heybagga, miðað við stóra bagga, meðalbagga og litla bagga (þrælaband, bögglar, skjattar, skaufar, o.s.frv.)? Var stærð heybands og binding við það miðuð, hvort heybandsvegur var langur eða skammur?
Var jafnan hirt um hey, er lá eftir heybagga á teig? Hvað nefndist það (rök eða annað)? Hvað nefndist verkið við að taka það upp? Var mikil áhersla lögð á það að ganga vel um teiga (raka teiga), er "staðið var í hirðingum". Lýsið þessu.