Gamla túnið.

Segið frá gamla túninu eins og það var, áður en jarðabætur og útfærslur túna hefjast. Lýsið því, hvernig gildi jarðar var metið eftir því hvort hún var góð túnajörð eða engjajörð. Var rætt um gildi einstakra grasa og jurta í túni til fóðurs? Lýsið mörkum túns og útjarðar þar sem grösin voru á mörkum þess að vera taða eða töðugæf og úthey. Var orðið samriskja, eða annað í stað þess, notað um slíka blöndun grasa? Voru ákveðin orð notuð um tún eftir stærð þess (kragi kringum bæinn, túnbleðill, túnflæmi o.s.frv.)? Þekktist orðið heimatak um tún?
Sáust merki um forna túngarða í túni eða utan túns? Voru túnblettir, girtir eða ógirtir, utan gamla heimatúnsins? Báru þeir sérstök heiti (Fjárhústún, Lambhústún, Stekkatún o.s.frv.)?
Voru ákveðnir blettir í túnum, sem báru nöfn eftir áburði, eldsneyti eða notkun utan sláttar (Taðbali, Eldiviðarbali, Ullarbali o.s.frv.)?
Lýsið aðstæðum þar sem lækur eða lækjarfarvegur rann gegnum túnið og hætta gat verið á aurrennsli. Kom fyrir að slíkir farvegir væru hlaðnir upp í stokk til að varna aurrennsli í leysingum að vetri, eða vori? Var með einhverjum hætti reynt að koma í veg fyrir skriðurennsli á brekkutún? Báru tún merki þess að í þeim hefði verið borin saman skriðumöl í hóla við vorhreinsun túns? Sáust fornir áveitustokkar (skurðir) í gömlum túnum eða að gömlum túnum?
Hvað nefndist heimreið að bænum (traðir t.d.)? Hvernig tengdist hún bænum eða bæjarhlaði? Var t.d. hestarétt tengd heimreið við bæinn?