A. ÍLÁT OG ÁHÖLD.

1. Hvað nefndust öll mjólkurílát einu nafni (klápar eða annað)?

2. a) Lýsið mjólkurtrogi. Hafið eftirfarandi atriði m.a. í huga: Stærð trogsins og gerð. Var hún breytileg? Stuðlaði réttur flái á hliðum mjólkurtrogs að því, að mjólk skildist fyrr en ella? Var á fárra smiða færi að smíða góð mjólkurtrog? Var mót notað við smíðina? Var viður meir valinn í mjólkurtrog en önnur ílát? Voru mjólkurtrog með gati og tappa, t.d. líkt og byttur? Hvar? Á gafli eða hlið? Voru trog merkt fangamarki eiganda og þá fremur húsfreyju en bónda?
b) Voru mjólkurtrog tekin til annarra nota ef á lá, notuð sem laugatrog t.d.?
c) Áttu mjólkurtrog nokkurt annað heiti?

3. a) Hvenær var byrjað að smíða byttur, og hvað nefndust þær í mæltu máli (byttur, balar, bakkar eða annað)?
b) Var eitt frekar öðru, sem studdi að útbreiðslu þeirra, t.d. betra notagildi, notkun garðajárns eða annað?
c) Voru til margar gerðir af byttum (kringlóttar, sporöskjulagaðar o.s.frv.)?
d) Var hætt að setja mjólk upp í trogum, er byttur komu til sögunnar?

4. Var sérstök rjómafata til á hverju heimili? Lýsið henni. Hvað nefndist hún?

5. a) Var strokkur nefndur nokkuð annað (bullustrokkur)? Hvað nefndust einstakir hlutar hans?
b) Voru til strokkar með tveimur bulluhausum, efri og neðri?
c) Þekktust aðrar gerðir af strokkum (sveifarstrokkur, handsnúnir strokkar, strokkar knúnir með vatnsafli o.s.frv.)?
d) Var talað um það, að strokkar væru sígyrtir? Hvað táknaði það?
e) Lýsið gjarðalásum og skýrið frá heitum þeirra (hálflás, heillás, stiglæsing, blaðstýfing, fjaðralás o.s.frv.).

6. Lýsið smérfjöl. Var hún kölluð nokkuð annað?

7. Voru sérstakar smérgeymslur á bæjum (kistur, kassar)?

8. Voru vissar stærðir af sméröskjum í notkun (engjaöskjur, ferðaöskjur o.s.frv.)?

9. a) Hvað nefndist ílát, sem skyr var hleypt í (hleypiskirna, skyrkirna skyrkolla, þélkirna, upphleypukerald, heypiskerald, þélkerald, skyrkerald, biðukolla o.s.frv.)? Lýsið skyrkeraldi.
b) Voru mörg skyrkeröld í umferð á meðalbúi?

10. a) Þekktust margar gerðir af skyrgrindum (botn með götum, úr rimlum, úr viðartágum o.s.frv.)?

11. Hvað nefndist spaði, sem hrært var með í skyrsá eða sýru (skyrspaði t.d.? Lýsið honum.

12. Hvað nefndist tréfata, sem skyr var fært í á engjar (engjafata, skyrfata t.d.)? Lýsið henni.

13. Voru margar gerðir af skyrsáum? Lýsið þeim. Hvað nefndust minni skyrílát (tunna, kaggi, t.d.)? Var sár nefndur annað, ker t.d.?

14. Hvað nefndist dallur, sem hleypir var geymdur í (lyfjadallur, hleypisdallur, hleypikolla, kæsisdallur t.d.)? Lýsið honum.

15. a) Hvað nefndist ílát, sem ostar voru mótaðir í (ostakirna, ostamót, ostadallur t.d.)? Lýsið því. Voru tréskálar notaðar sem ostamót?

16. Lýsið ostapoka, efni hans og gerð, vefnaði eða prjóni o.s.frv.)?

17. a) Voru sérstakir sýrukútar til á hverju heimili og hafðir með á engjar eða í sjóferðum? Hvað nefndust þeir blöndukútar t.d.)?
b) Voru sýru- eða drykkjarleglar einkum notaðir í kaupstaðarferðum? Hvernig var gengið frá þeim í flutningi?
c) Voru til skinnbelgir sem sýra vara flutt í mili byggða? Hvað nefndust þeir, blöndubelgir t.d.? Lýsið þeim.

18. a) Hvað nefndist ílát, sem sýra var geymd í á heimili (sýruker t.d.)?
b) Var drykkjarsýra geymd í sérstökum ílátum (tvíbytnum t.d.)? Lýsið þeim.

19. Lýsið flautaþyrli.

20. Lýsið skyrsíu. Minnist eftirfarandi atriða: a) Voru til skyrsíur saumaðar úr hrosshári eða kýrhalahári? Hvernig var hárið verkað og unnið? Hvað var saumurinn kallaður? Hvernig var nálsporið? Hvernig var gengið frá jöðrum? b) voru skyrsíur prjónaðar? Hvaða efni var notað í þær, togþráður t.d.? Hvernig var hann unninn? ? Hvernig var prjónið, og hvar var það nefnt (garðaprjón, barðaprjón t.d.)? c) Voru skyrsíur einnig ofnar? Með hvaða vefnaðarvend, einskeftu t.d.? Hvernig var unnið í uppistöðu og fyrirvaf? Hvernig var dregið í höföld og skeið? Hvernig var gefið upp í (gisið, þétt)? Voru hankar saumaðir á jaðra? Var skyrsía kölluð nokkuð annað?

21. Voru strokksíur gerðar með sömu aðferðum og skyrsíur? Voru til strokksíur gerðar úr jurtarótum (rofalíum, melbusku, sumtagi t.d.)? Hvernig? Hvað nefndist strokksía (síll, síill, sígill t.d.)? Var strokksían notuð ein eða með öðru áhaldi (trésveig eða trogi)? Hvað hét það (trygill t.d.)? Lýsið þessu.

22. a) Hvaða efni var notað í mjólkurþvögur? Voru þær saumaðar, prjónaðar eða gerðar á annan hátt (upp í hönk t.d.)? Lýsið því. Var þvaga nefnd annað, t.d. þvegill? Voru margar þvögur í notkun á hverju búi (pottaþvaga, trogaþvaga o.s.frv.)?
b) Voru farnar sérstakar söluferðir með melrætur í þvögur og þá fremur af konum en körlum? Með hverju var greitt? Var greitt eftir ákveðnum reglum (miðað við þyngd t.d.) eða af handahófi? Hvað nefndist hráefnið (flæðimelur, rofamelur, buska eða annað)?

23. Hvaða áhöld voru notuð til að hreinsa með flóningarpottinn (pottaskafi, pottsteinn, ketilhrífur o.s.frv.)? Lýsið þeim.

24. Hvað nefndust klútar, sem mjólkurtrog voru þurrkuð með (trogaklútar,mjólkuklútar t.d.)? Hvaða efni var í þeim?

25. Hvað nefndust áhöld, sem notuð voru við kálskurð (káljárn, kálbaretti t.d.)? Lýsið þeim.

26. Voru til fastar, gamlar reglur um greiðslu smíðalauna í mjólkurmat, t.d. aususmíði greidd með ausufylli af sméri?

27. Hvernig var skilvindum tekið, er þær komu fyrst í notkun? Báru konur þá mjólk milli bæja, þar sem tök voru á, til að skilja hana?