Legið frá, viðlega.

Var heyjað svo fjarri býlum, að ekki væri komið heim að kvöldi frá heyverkum? Hvað var það nefnt (viðlega að liggja við, liggja frá o.s.frv.)? Voru þá sérstök hús (beitarhús t.d.), sem legið var við í? Voru hústættur í slægjum eða í nánd þeirra, sem gert var yfir eða tjaldað yfir, er kom að engjaslætti? Lýsið því. Var legið við í tjöldum (engjatjöldum)? Lýsið þeim, efni, gerð og stærð. Var legið við í hellum (leguból)? Lýsið því.
Lýsið rúmstæðum eða sængurfletum í viðlegu. Lýsið sængurfatnaði í viðlegu.
Hvað var til lýsingar á kvöldum?
Voru viðlegustaðir engjafólks hinir sömu frá ári til árs? Nefndust þeir nokkuð?
Voru sérstök eldstæði eða hlóðir í viðlegustöðu engjafólks? Hvar var þeim komið fyrir? Lýsið þeim. Lýsið eldsneyti, öflun þess og flutningi.
Hvernig var heyskaparfólk gert út með mat og drykk í viðlegu? Voru sérstök ílát (skrínur t.d.) til þeirra flutninga? Var matur e.t.v. að einhverju leyti fluttur daglega til viðlegufólks? Hvaða matur? Lýsið þessu.
Hvenær var að jafnaði risið á fætur til verka að morgni í viðlegu? Lýsið hvíldartímum og verkalokum (hættum) að kvöldi.
Voru dæmi þess, að konur hefðu prjóna sína með sér í viðlegu til að grípa í ef ekki varð staðið við verk vegna veðurs? Höfðu konur með sér nál og nálþráð í viðlegu að grípa til ef föt þörfnuðust viðgerða? Höfðu karlmenn með sér nokkur aukaverkefni af sömu eða öðrum ástæðum?
Hafði fólk nokkuð sér til skemmtunar, er sest var að á kvöldin í viðlegu (söngur, rímnakveðskapur, sögur, spil, töfl, þrautir)? Dvaldi viðlegufólk venjulega heima um helgar? Var þá e.t.v. hætt fyrr verkum á laugardagskvöldum en aðra daga? Lýsið því.