REIÐINGSRISTA.

Var torfreiðingur almennt notaður við klyfjaflutninga á hestum, eða áttu bændur völ á öðrum gerðum reiðings, t.d. melreiðing, heimafengnum eða aðkeyptum? Segið frá því.
Voru sambærileg orð notuð um reiðingsefni í mýri og t.d. torf (reiðingsvöllur, reiðingsrista)?
Seldu bændur reiðingsristu í landi sínu eða skorinn reiðing? Segið frá þeim viðskiptum. Var reiðingur skorinn og seldur til annarra nota, t.d. til einangrunar í hús?
Voru sérstakir ljáir notaðir til þess að rista með reiðing, eða voru sláttuljáir notaðir til þess eingöngu? Lýsið reiðingsljá. Lýsið reiðingsvelli.
Hvenær var venjulega starfað að því að rista reiðing? Hvað var verkið kallað (að rista, skera reiðing t.d.)?
Var skorið ofan af reiðingsefninu með torfljá? Var það nefnt nokkuð? Hvernig var mælingu (ummál, þykkt) á reiðingsefni háttað (torfu, dýnum, undirlagi)? Var mælt í fetum eða á annan hátt, t.d. höfð sérstök mæligrind (reiðingsgrind)?
Lýsið reiðingsskurðinum sjálfum frá byrjun til þess, er lokið var við að losa úr flagi (pælu)?
Var reiðingnum hlaðið upp við pæluna? Hvenær var hann fluttur heim?
Hvernig var þurrkun háttað? Var reiðingur þurrkaður í hellum eða bólum, ef aðstæður leyfðu? Minna örnefni á það (Reiðingsból t.d.)?