Rúm í baðstofu

Var algengt að miða lengd baðstofu við það, hve mörg rúm gátu staðið í henni við hliðvegg (tveggja rúma lengd, þriggja rúma lengd o.s.frv.)? Lýsið hversu rúm voru hluti af innsmíði baðstofu (fastarúm). Var algengt að stafir frá gólfi upp í sperru (innstafir) mörkuðu skil milli rúma? Var orðið stafgólf almennt notað um bilið milli stafa og þar með rúmlengdina? Var miðað við nokkurn veginn fasta lengd stafgólfs og þar með rúmstæðis? Hafa menn heyrt talað um það að ákveðið mál á meðalmanni væri hæfileg rúmlengd (t.d. faðmur á þumalfingursgóma)? Var að jafnaði miðað við hæfilega rúmbreidd t.d. að rúm væri tveggja manna rúm? Var venju fremur mjótt rúm nefnt nokkuð í niðrunarskyni (prjónastokkur t.d.)?
Hvað nefndust einstakir hlutar rúmstæðis (höfðagafl, fótagafl, rúmstokkur, rúmbrík, stafir, stuðlar, marar, rúmbotn o.s.frv.)? Lýsið milligerðum milli rúma. Var ekki ótítt að þær næðu upp í súð svo rúmin urðu nokkurskonar lokrekkjur?
Voru dæmi þess að rúmbríkur væru útskornar (gestarúm, hjónarúm t.d.)? Gegndu innstafir milli rúma ákveðnu hlutverki í sambandi við störf fólks, t.d. hrosshársvinnu, eltingu skinna, til að festa við ljósfæri eða annað?
Lýsið rúmum í baðstofu, sem ekki var gerð upp með innstöfum. Voru þau rúm að öðru eins en því, sem viðkom rúmstólpum eða stuðlum? Var algengt að nota rúmstuðla í stað kertastjaka eða til hjálpar við vinnu, t.d. til að festa við hesputré?
Var algengt að þverrúm, eitt eða tvö, væru fyrir gafli á baðstofu, ef svo hagaði til um lengd hússins?
Var talað um fastarúm og lausarúm og þá miðað við að hvert einstakt rúm stæði laust á gólfi? Útrýmdu lausarúm fastarúmum á lokaskeiði sveitabaðstofunnar? Voru þau rúm heimasmíðuð eða aðfengin?
Um ýmsar viðartegundir var að ræða til að smíða rúm úr. Lýsið því. Var sérstaklega gætt að því að nota ekki selju (blóðselju eða hvítselju) til smíða í rúm?