Rúningur

Hvað nefndist starfið við að losa sauðkind úr reyfi (so. rýja, losa úr reyfi, taka af, no. rúningur t.d.)? Segið frá öðrum orðum, sem þetta varða (rúningsdagur, rúningsmaður o.s.frv.).
Hvenær var að jafnaði byrjað að rýja sæmilega framgengið sauðfé: a) sauði, b) geldfé, c) lambfé? Miðaðist rúningsdagur e.t.v. við það, er sauðfé var rekið á fjall (afrétt)?
Þótti betra að rýja með vaxandi tungli en minnkandi? Hvers vegna?
Hvaða orð voru notuð um það, er hæfilegt þótti að byrja að smala sauðfé til rúnings, miðað við ullarvöxt (góð klippa, fillding, filling, rýing, skil o.s.frv. lo. filldur, björnfilldur o.s.frv.)?
Hvaða orð voru notuð um andsætuna (féð gengur illa úr reyfi, fer illa úr ull, er bert, mannsbert o.s.frv.)?
Hvaða orð voru notuð um það er ull var farin að losna á sauðfé (það er farið að flaka á fénu, farið að húsa, með rúkraga, ærin dregur lagðinn, reyfið o.s.frv.)?
Var reynt að varna því, að illa framgengið sauðfé týndi reyfi, ullin t.d. lagfærð og hnýtt að á bringu og í nárum?
Kom fyrir, að saumað væri yfir sauðkind, sem búin var að týna reyfi, til að varna því, að hún króknaði?
Hvaða var það nefnt, er skóglendi átti þátt í að ull losnaði á sauðfé (að féð væri skógdregið t.d.)? Ömuðust bændur við skógum af þeim sökum?
Var það nefnt nokkuð sérstakt, er aukasmölun var gerð til að rýja sauðfé, sem ull fór illa á (að stugga saman, hramsa saman t.d.)?
Segið frá áhöldum við rúning (sauðaklippum, skærum, hnífum o.s.frv.). Er e.t.v. stutt síðan farið var að nota fjárklippur eða önnur áhöld við rúning?
Voru til heimasmíðaðar fjárklippur og heimasmíðuð skæri? Lýsið því.
Hvað var það nefnt, er reyfið lá laust fyrir við rúninginn (að ná ullinni "í einni flettu", eða annað)?
Var yfirleitt haldið í lambær, er þær voru rúnar, og gegndi þá sama máli, hvort þær voru hyrndar eða kollóttar?
Var geldfé lagt niður og bundið á fótum, meðan það var rúið?
Hvernig var bundið? Var það nefnt að binda í sauðband (sauðaband)? Lýsið sauðbandi.
Var sauðfé bundið öðrum hætti við rúning? Lýsið því. Var sauðfé haldið niðri, óbundnu við rúning?
Voru lambær yfirleitt ekki rúnar, fyrr en búið var að finna lömb þeirra í réttinni? Hvað var það nefnt (að lemba t.d.)?
Vara reyfið losað eftir vissri reglu (fyrst á hálsi og síðan jafnt aftur eftir báðum síðum t.d.)?
Var kviðull aldrei skilin eftir órúin?
Var bringukollur aldrei klipptur?
Var hnakkinn klipptur?
Var signt (krossað yfir kindina), um leið og reyfið var losað að fullu, og eitthvað sagt til heilla (Farðu nú heil í haga o.s.frv.)?
Voru lambær lembdar út úr réttinni, um leið og búið var að rýja þær?
Voru ullarlagðar rakaðir út úr réttum eftir rúningsdaga? Hvernig var hirt um þá?
Þekkist orðið ullarvaður um ullarslæðing, t.d. í rétt? Hvað nefndist ullarhrúga á réttarvegg (ullarbingur t.d.)?