Skipting slægna í reiti eða skákir milli jarða í margbýli.

Var slægjulandi í túni eða engjum skipt í skákir eða reiti milli bæja í tvíbýli eða margbýli og þá farið eftir stærð eða hundraðatali jarða? Hvað nefndust slíkir reitir (skákir t.d.)? Lýsið skiptingu og stærð skáka að því leyti til sem hægt er. Höfðu einstakar jarðir sömu skákir frá ári til árs eða voru höfð á þeim áraskipti? Þekktist það að bændur heyjuðu í samvinnu á einstökum skákum eða spildum, þar sem um sameign var að ræða? Áttu jarðir slægjuítök í landi annarra jarða? Greinið frá þeim. Gengu þau undir ákveðnum samheitum (teigur, völlur, skipti t.d.)? Komu einhver ákveðin réttindi eða ítök á móti slíkum slægjuítökum (beitarréttindi, skógarítök, t.d). Haldast slík ítök enn til þessa dags? Lýsið mörkum á milli slægjulanda, teiga eða skáka. Lýsið, hvernig mörkum var haldið við, þar sem þörf krafði. Kunna menn að segja frá því, að gengið hafi verið á mörk til athugunar eða réttingar ef ágreiningur kom upp um þau?