Slægjulönd.

Var orðið slægja eða slægjur almennt notað um slægjulönd hverrar jarðar? Var orðið teigur eða teigar fremur notað um land, sem búið var að slá eða hirða af hey? Gerið grein fyrir slægjulöndum allt frá túni til mesta votlendis.
a) Tún. Var orðið tún almennt notað um ræktað land út frá sveitabýli? Var það einnig notað um ræktað land lengra burtu og þá oft með forskeyti (fjárhústún, stekkjatún, o.s.frv.)? Var orðið heimatak einnig notað í merkingunni tún eða heimatún? Segið frá einstökum hlutum slægna innan túns, sem slegnir voru með því (bæjarþök, veggir, garðar, varpi, o.s.frv.). Var nokkurt sérstakt nafn notað um útskefjar (útjaðra) á túni? Segið frá áliti manna og skoðunum á einstökum tegundum grasa og jurta, sem uxu í túni (smæra, kornsúra, lokasjóður, sóley, kúmen t.d.). Voru mismunandi orð eða hugtök notuð um tún sem ræktað land (áborið land, tatt land t.d.)? Segið frá landi með töðugæfu heyi utan túns (eyjalönd t.d. þar sem gróður naut góðs af fugladriti).
b) Vallendi utan túns. Gerið grein fyrir valllendisgróðri með tilliti til fóðurgildis m.a. (reyr, eski, elfting o.s.frv.).
c) Hálfdeigja, milli mýrar og vallendis. Var nokkurt samheiti um gróður, sem var sambland af valllendisgróðri og mýrargróðri (milli mýrar og valllendis, samriskja o.s.frv.)? Gerið grein fyrir honum.
d). Mýri. Gerið grein fyrir mýrargróðri, m.a. með tilliti til fóðurgildis (kúgæft hey, fjárhey, t.d.).
e) Áveitur, áveituengi. Gerið grein fyrir áveitum á slægjulönd. Lýsið, hvernig að þeim var unnið (skurðir, flóðgarðar). Voru einstakir bændur, sem gengu þarna á undan öðrum í framkvæmdum? Hvenær var vatni hleypt yfir, hvenær tekið af? Segið frá þýðingu áveitna fyrir aukinn og bættan heyfeng bænda, m.a. með tilliti til breytts fóðurgildis grasa.
f) Flæðiengi, ósengi m.a. Áttu "óbeislaðar" ár þátt í að auka heyfeng með rennsli um engjalönd, t.d. í ísalögum eða í leysingum? Áttu vötn með breytilegu vatnsborði þátt í að auka grasvöxt á engjum (flæðiengi, ósengi)? Voru einstök vötn, lón eða árósar, sem lokuðust með vatnsrennsli (frárennsli) á vissum árstímum og flæddu yfir engjalönd bænda? Lýsið slíkum uppistöðum vatna ef um þær var að ræða. Hvenær voru þær hagfelldastar fyrir gróðurinn.
g). Nes, nesslægjur. Hvað táknar orðið nes í mæltu máli? Segið frá nesi sem slægjulandi, ef um það var að ræða, gróðurfari og öðru, er efnið varðar.
h) Önnur gróðurlendi til slægna. Gerið grein fyrir slægjulöndum til heiða eða fjalla, gróðurfari og fóðurnotum (stör, brok, víðilauf, kvistur, o.s.frv.). Gerið grein fyrir fóðuröflun í flóum, blám, flóðum, tjörnum, rotum eða öðru votlendi. Gerið grein fyrir gróðri þar og gildi hans til fóðurs. Þekktist það, að melblaðka væri slegin til fóðurs? Lýsið því.