Spár dýra og annarra lífvera

Hvernig réðu menn veður næstu daga eða dægra af hátterni húsdýra utan húss eða innan: a) hesta, b) nautgripa, c) sauðfjár, d) geitfjár, e) hunda, f) katta? Gátu þær spár e.t.v. stundum boðað veðráttu heilla árstíða, t.d. vetrar?
Réðu menn á einhvern veg veður af hátterni hagamúsa eða húsamúsa? Koma rottur nokkuð við veðurspár? Var almennt tekið mark á hátterni fugla þegar spáð var fyrir um veður? Segið frá þessu varðandi einstakar tegundir land- og sjófugla. Lýsið þá á hvern veg þetta var, t.d. bundið kvaki þeirra, flugi og hreyfingum á landi, vatni eða sjó og þá færslu þeirra milli staða.
Fólst veðurspá gagnvart vori eða sumri í komutíma farfugla, t.d. miðað við einstakar tegundir þeirra (lóu, máríátlu, spóa, hrossagauk o.s.frv.)? Gat veðurspá falist í atferli sela í eða við sjó? Gat veðurspá falist í atferli fiska í vatni eða sjó t.d. því hvernig fiskur veiddist í vatni? Á hvern hátt spáðu skordýr fyrir veðri? Greinið frá því um einstakar tegundir (flugur, fiðrildi, köngulær o.s.frv.).
Vetrarkvíði er allþekkt fyrirbæri á jörð að úthallandi sumri, örfínir glitrandi þræðir á gróðri jarðar. Var í þessu viðurkennd veðurspá? Lýsið því. Var einhver veðurspá fólgin í gróðri jarðar, t.d. gagnvart snjó- eða vetrarhörkum (fífa, snjónál t.d.)? Kannast menn við fyrirbærið eða orðið ýlustrá eða önnur nöfn á því? Hvað felst í því og er það tengt veðurspám?
Gátu gerlar í mjólkurmat veitt vísbendingar um veður, t.d. breytingar í súru skyri, þegar það braut sig sem kallað var? Mátti nokkuð marka á lýsi í tunnum hvaða veðurs væri von?
Kannast menn við veðurspár byggðar á athugun innyfla nauta eða sauða (milta, garnir)? Áttu menn sér "loftvogir" í líki útþaninnar hlandblöðru stórgrips eða sauðkindar, þanins líknarbelgs eða þanins rjúpusarps? Hvað nefndist sú loftvog? Hvar hékk hún uppi? Var spáð fyrir veðri eftir kerlingarsvuntunni í hörðum fiskivanga? Lýsið öðru er varðar veðurspár á þessu sviði.