Túnasléttur.

Lýsið hvernig unnið var að sléttun þýfðra túna og hvernig sléttu spildrunar stækkuðu út frá bænum ár frá ári. Minnist m.a. eftirfarandi atriða: Hefjast túnasléttur á sama tímabili hjá öllum bændum byggðarinnar? Var á einstaka stað um að ræða slétt tún frá fornu fari? Voru dæmi þess að einstakir bændur væru mótfallnir túnasléttun vegna þess að hún minnkaði flatarmál graslendis? Á hvaða árstímum var einkum unnið að túnasléttun? Lýsið á hvern hátt það var háð veðri. Var um samhjálp bænda að ræða við túnasléttur? Hjálpaðist vinnufært fólk á heimili að við túnasléttur (bóndi, húsfreyja, börn, vinnuhjú)? Voru dæmi þess að mönnum væri sett fyrir að skera ofan af eða ljúka ákveðinni spildu á dag að ferfaðmatali? Voru dæmi þess að vinnuhópar færu á mili bæja og ynnu hjá bændum við túnasléttur fyrir ákveðið kaup?
Lýsið hvernig unnið var að túnasléttun í áföngum (rist fyrir, skorið ofan af, flagið pælt, borið í, lagt niður o.s.frv.). Segið frá áburði í flög. Var algengt, þar sem þess var kostur að nota fiskslóg í flög?
Voru ákveðin einkenni í vinnutilhögun eða framkvæmd verks, sem tryggja átti góða endingu sléttunnar (beðsléttur með hliðahalla t.d.)? Voru í byrjun oft sléttaðar reinar í því til að auðvelda breiðslu á heyi? Markar enn í túnum fyrir elstu þúfnasléttun? Var sléttun í túnum stundum gefið nafn eftir manni, sem að þeim hafði unnið?
Lýsið sérstaklega starfi manna í þorpum eða kaupstöðum við ræktun túna til eigin nota.