Útileikir.

Gerið grein fyrir því hversu leikir voru háðir ákveðnum árstíðum og mismunandi önnum heimila. Lýsið því hversu börn söfnuðust saman frá nærliggjandi bæjum og byggðahverfum til leikja.
Voru leikir bundnir við ákveðnar stundir dagsins? Greinið frá leikjum skólabarna í frímínútum. Gerið sérstaklega grein fyrir því ef kennarar höfðu áhrif í þá átt að kenna börnum ákveðna leiki og höfðu hönd í bagga með leikjum barna.
Lýsið útileikjum barna svo sem tök eru á. Greinið frá leikreglum og nöfnum leikja. Hér er stefnt á leiki eins og skessuleik, kallsleik, útilegumannaleik, fuglaleik, brúarleik, að hlaupa í skarðið, höfrungahlaup, slagbolta, parís o.s.frv. Oft er erfitt að setja takmörk á milli leikja og íþrótta. Því er hér einnig beðið um að gera grein fyrir því hvenær leikir barna seilast í átt til íþrótta (t.d. hlaup, handahlaup, stökk, glímur o.s.frv.).
Minna má hér einnig á leiki með flugdreka, gjarði, skotboga o.s.frv.
Hafa verulegar breytingar orðið á útileikjum barna t.d. frá síðustu aldamótum, gamlir leikir lagst niður og aðrir komið til sögunnar? Hafa breyttir búskaparhættir t.d. og breyttur aldarandi átt þátt í að breyta barnaleikjum?