Varnir slægna, vakað yfir velli, girðingar o.fl.

Ekki er ákaflega langt til þess að rekja, er slægjur jarða voru að miklu leyti óvarðar fyrir ágangi búfjár. Hér er óskað eftir því, að menn geri grein fyrir slægjuvörnum, a) í túni, b) á engjum. Kunna menn að segja frá því, að vakað var yfir túni á vori eða sumri til að bægja fénaði brott? Hvað nefndist það (að vaka yfir velli t.d.)? Hvenær hófst sú vörn að vori eða sumri? Lýsið hvernig fénaði var vikið (stuggað, sigað) frá túni að kvöldi. Á hvaða tíma kvölds eða nætur hófst varslan (vakan), og var þá vakað til fótaferðar? Hverjir önnuðust um þessa vörslu (börn, unglingar)? Hvernig var þessu háttað, þar sem tvíbýli eða margbýli var á jörðum?
Var miðað við vissan tíma að vori eða sumri, er byrjað var að verja engjalönd fyrir fénaði, og var það e.t.v. breytilegt eftir því um hvaða fénað var að ræða (hross, sauðfé, kýr)? Lýsið engjavörslu, þar sem engjalönd voru ógirt. Lýsið beitingu hunda í þessari vörslu og hjálpartækjum svo sem hrossabresti eða öðrum tækjum til að gera hávaða. Segið frá samvinnu bænda um engjavörslu, er um hana var að ræða (skipt dögum t.d.)? Hvað nefndist þetta starf?
Voru hlaðnir fjárheldir garðar úr torfi eða grjóti um tún og engi? Lýsið girðingum, hvernig þær þróuðust stig af stigi (hlaðnar "vörður" undir girðingarstólpa og vírstrengi, hlaðið undir vírstrengi, vírnet, gaddavír o.s.frv.).