Veðrið og maðurinn

Var almennt talað um veðurglögga menn? Átti sá hæfileiki sér mismunandi orsakir að áliti manna? Var vitnað til slíkra manna og eftir þeim farið um ákvörðun verka á landi og sjó? Segið frá veðurglöggum mönnum ef hægt er. Lýsið hvernig menn fundu á sér veður af einum eða öðrum ósjálfráðum viðbrögðum í líkama sínum (gigtarverkir, beinverkir, kalt leggst í mann o.s.frv.). Lýsið sem gleggst hvernig menn mörkuðu veður af draumum sínum. Hver voru þá t.d. tákn: a) snjókomu, b) harðinda, c) þýðviðris eða þeys, d) regns, e) sólskins og þerris? Dreymdi menn e.t.v. fyrir veðri til langs tíma, jafnvel vetrarveðri eða sumarveðri?
Var nokkur varúð viðhöfð í því að lofa mjög gott veður eða lasta vont veður? Gátu menn á einhvern hátt með athöfnum sínum átt þátt í að breyta veðri sér í vil eða hindra illviðri? Þekkja menn t.d. sagnir um að dauðri mús væri kastað í þá átt sem menn vildu að viðraði úr? Þekkja menn sagnir um að harður lönguhaus gæti orsakað veðurbreytingu, ef rétt var að staðið? Þekktist sú trú að veðurbreytingu leiddi af því að hlaða snjókerlingu eða snjókarl? Hvaða athafnir bar mönnum einkum að varast gagnvart veðurbreytingum, er menn voru t.d. á sjó eða við heyskap?
Voru kunn einstök sálmavers, heilir sálmar eða annar kveðskapur sem gat sefað illt veður eða storm ef þau voru höfð yfir eða sungin (veðursálmur t.d.)? Var nokkur trú þekkt varðandi veður (staðviðri) meðan lík beið greftrunar eða með veður á jarðarfarardegi? Var trú á veðurbreytingar í einhverju tengd vikudögum eða vikubyrjun (sunnudagsþerrir t.d.)? Var nokkur trú þekkt varðandi það er kirkjuföt blotnuðu í messuför?