Gáttaþefur og Flotsokka, sunnudaginn 22. desember
Sunnudaginn 22. des kemur Gáttaþefur með sitt heljarstóra nef stundvíslega klukkan 11 og Flotsokka systir hans með fulla sokka af floti og fjöri.
Jólasveinaheimsóknir eru fastur liður í jólaundirbúningi á aðventunni. Söngur, fjör og fullt hús af glöðum gestum.
Flotsokka ólst upp í Grýluhelli. Hún hefur sínar kenjar eins og bræður sínir og systur. Í vísunum um jólaskellurnar segir um Flotsokku:
Flotsokka er fundvís
á feitmeti um allt
og fyllir sokka af floti
– á fótum er aldrei kalt.
Þá gengið er til náða
hún nartar í mörinn hljóð
og kleinufeiti er uppáhald,
svo ofboðslega góð.
Gáttaþefur hefur líka sínar kenjar eins og allir þekkja:
Ellefti var Gáttaþefur,
- aldrei fékk sá kvef,
og hafði þó svo hlálegt
og heljarstórt nef.
Hann ilm af laufabrauði
upp á heiðar fann,
og léttur, eins og reykur,
á lyktina rann.
Frítt fyrir börn. Miði í safnið fyrir fullorðna kostar 2.500 kr. og gildir á allaviðburði og sýningar í ár frá kaupum.
Við hlökkum til að sjá ykkur.