Tilnefning til FÍT-verðlauna
Tilkynnt hefur verið um tilnefningar til FÍT-verðlaunanna 2018 sem eru veitt af Félagi íslenskra teiknara. Þau eru veitt fyrir verk sem sköruðu fram úr á sviði grafískrar hönnunar og myndskreytinga á liðnu ári.
Í ár voru 350 innsendingar í FÍT-keppnina og tilnefnt er í 21 flokki. Í flokknum bókahönnun er Langa blokkin í Efra Breiðholti tilnefnd. Hönnuður er Bobby Breiðholt á auglýsingastofunni ENNEMM. Útgefandi er Þjóðminjasafn Íslands.
FÍT verðlaunin 2018 verða afhent við formlega athöfn í Tjarnarbíói miðvikudaginn 14. mars. Viðburðurinn markar upphaf HönnunarMars sem verður haldinn 15. til 16. mars.
Sýningin Langa blokkin í Efra Breiðholti var opnuð 20. janúar 2018 í Myndasal Þjóðminjasafns Íslands. Á sýningunni eru ljósmyndir eftir David Barreiro en hann hlaut árið 2016 styrk úr sjóði Hjálmars R. Bárðarsonar í Ljósmyndasafni Íslands og er sýningin árangur styrksins. Í tilefni sýningarinnar gaf Þjóðminjasafn Íslands út samnefnt rit með myndum Barreiro. Nánar má lesa um sýninguna hér.
Bókin fæst í safn- og vefbúð Þjóðminjasafns Íslands.