Þjóð verður til
  • Grunnsýning

Þjóð verður til. Menning og samfélag í 1200 ár

  • Grunnsýning Þjóðminjasafnið á Suðurgötu

Á grunnsýningu Þjóðminjasafnsins er leitast við að draga upp skýra og heillega mynd af menningarsögu Íslendinga. Gripir safnsins eru settir í sögulegt samhengi þar sem tekið er mið af tiltækum rannsóknum. Ýmsum aðferðum í sýningargerð er beitt til að miðla til gesta fjölbreyttum menningararfi þjóðarinnar.

Uppbygging sýningarinnar

Íslandssagan er rakin í tímaröð frá landnámi til nútímans. Sögunni er skipt nokkuð jafnt upp í sjö tímabil og með því móti er m.a. varpað ljósi á þau tímaskeið sem í hefðbundinni sögutúlkun hafa gjarnan fallið í skuggann af þeim sem talin hafa verið merkilegri og frásagnarverðari.

Miðaldarkirkja

Hvert tímabil er auðkennt með sérstökum skáp, sem sýnir lykilgrip og gefur örstutt yfirlit[ÞÓ1] um helstu einkenni þess. Fyrir hvert tímabil eru valdir atburðir eða merkar nýjungar sem markað hafa spor í þjóðarsöguna en einnig er bent á þá þætti sem lítið breyttust um aldir. Saman mynda þessir atburðir sögu hvers tímabils sem sýnd er með gripum.

Gestum er boðið upp á fleiri möguleika en hefðbundna til að njóta sýningarinnar. Hægt er að hlusta á raddir fyrri alda í hljóðstöðvum og gagnvirkt margmiðlunarefni á snertiskjáum opnar leiðir að auknum skilningi og dýpri. Í herbergi sem er helgað svokallaðri skemmtimenntun má snerta muni og klæðast búningum og í minningarstofu eru gestir leiddir inn í stofu sem er útbúin eins og tíðkaðist á ýmsum heimilum árin 1955–1965.

Grunnsýningin er hugsuð sem ferðalag í gegnum í gegnum tíðina sem hefst í knerri landnámsfólks sem kemur siglandi yfir opið haf til nýrra heimkynna og lýkur svo í flughöfn nútímans– núverandi gátt Íslendinga að heiman og heim.

Baðstofa

Hægt er að bóka leiðsögn um sýninguna fyrir hópa með því að senda tölvupóst á bokun@thjodminjasafn.is.