Á sýningunni Rósaleppaprjón í nýju ljósi mátti sjá prjónamynstur og verk eftir Hélène Magnússon. Sýningin byggði á rannsóknum á íleppum eða rósaleppum sem voru prjónuð innlegg í íslenska sauðskinnsskó eða roðskó til þæginda og skrauts. Hélène hefur út frá svo kölluðu rósaleppaprjóni hannað eigin prjónamynstur. Sýningin var haldinn í tilefni af útkomu samnefndrar bókar þar sem listakonan birti rannsóknir sínar og uppskriftir.

Ókunn sjónarhorn var greiningarsýning með myndum úr safni Þjóðminjasafnsins sem sýna óþekkta staði, hús og fólk. Ekki hafði tekist að bera kennsl á myndefnið og voru gestir beðnir um að þekkja það og gefa upplýsingar um það! Á sýningunni mátti sjá tæplega 150 ljósmyndir víða að af landinu, flestar teknar á tímabilinu 1930-1950. Skráningarblöð lágu frammi við sýninguna og þegar aðeins stutt var liðið á sýningartímann hafði þegar tekist að greina margar myndir með hjálp frá gestum Þjóðminjasafnsins. Slík greining gefur myndunum nýtt líf og gerir þær að mikilsverðari heimildum um fortíðina.

Myndir úr lífi mínu nefndist sýning á ljósmyndum Gunnlaugs P. Kristinssonar (1929-2006). Gunnlaugur var virkur áhugaljósmyndari á Akureyri upp úr miðri 20. öld. Hann tók myndir af samfélaginu sem hann lifði og starfaði í, umhverfinu, viðburðunum og hversdagsleikanum heima og heiman. Gunnlaugur var starfsmaður KEA (Kaupfélags Eyfirðinga á Akureyri) og því oft á vettvangi atburða þar sem hann gat myndað í leiðinni. Gunnlaugur veitti samtímamönnum sínum hlutdeild í þessum myndum með því að birta þær í bæjarblöðum og margs konar útgáfu á vegum KEA.

Í Rannsóknarými Þjóðminjasafnsins á 2. hæð voru til sýnis íslenskir búningar og búningaskart 7. ágúst til 19. nóvember 2006. Þar gat að líta úrval búningasilfurs frá lokum 17. aldar til okkar tíma: ennisspangir, koffur, sprotabelti, lyklasylgjur, húfu- og sjalprjóna, skúfhólka, millur, reimanálar og samfelluhnappa.

Sýningin Ísland var helguð ólíkri sýn tveggja Evrópubúa á landið. Sumarið 1938 ferðuðust þjóðverjinn Alfred Ehrhardt og Englendingurinn Mark Watson um Ísland. Báðir komu til að sjá og upplifa náttúru landsins en tilgangur þeirra var þó ólíkur. Watson hafði dreymt um að sjá landið frá bernsku og ljósmyndir hans eru í anda almennra ferðamynda. Eins og myndirnar vitna um var hann mjög liðtækur ljósmyndari.

Sýningin Flug(a) - milli náttúru og menningar, samanstendur af ljósmyndum eftir Bryndísi Snæbjörnsdóttur og Mark Wilson. Á ljósmyndunum birtist samband mannsins við náttúruna í sambandi hans við dýrin. Heimili gæludýra innan borgarmarkanna eru í brennidepli. Bryndís og Mark fengu rjúpnaskyttur til að skjóta einu haglaskoti hver á kort af miðborg Reykjavíkur. Þar sem gæludýr voru í húsunum sem urðu fyrir skoti voru heimilin ljósmynduð. Listamennirnir unnu líka með nemendum Austurbæjarskóla undir stjórn Guðlaugs Valgarðssonar kennara og má sjá afrakstur þess samstarfs á Torginu hjá Kaffitár.

Þann 27. apríl - 12. maí árið 2006 mátti á Torginu sjá sýningu á myndlistarverki eftir leikskólabörn sem þau sköpuðu innblásin af heimsókn á Þjóðminjasafnið. 

Hvað er einn litningur milli vina? er heitið á sýningu Hörpu Hrund Njálsdóttir sem sýndi fallegar og skemmtilegar ljósmyndir af börnum með Downs heilkenni á Veggnum á 1. hæð, framan við Myndasal Þjóðminjasafnsins.

Sýningin Norður/North með ljósmyndum Marco Paoluzzo var opnuð í Myndasal Þjóðminjasafnsins í desember 2005. Marco Paoluzzo er svissneskur ljósmyndari sem hefur á síðasta áratug sérhæft sig í vaxandi mæli í ferðaljósmyndun. Leiðir hans hafa legið víða um heiminn. Helsti vettvangur fyrir myndir hans hefur verið tímarit Hann hefur gefið út ljósmyndabækur frá Shanghai í Kína, Kúbu, Ameríku og Freiburgarsvæðinu í heimalandi sínu Sviss auk tveggja ljósmyndabóka um Ísland. Allar eru þessar bækur með svart hvítum myndum en Marco myndar jöfnum höndum í lit og svart hvítu.