Öll vötn renna til sjávar. Móttaka gripa úr fornleifarannsóknum 2020
Ármann Guðmundsson og Hrönn Konráðsdóttir, sérfræðingar í Munasafni Þjóðminjasafns Íslands, flytja hádegisfyrirlestur í fyrirlestrasal safnsins 23. febrúar kl. 12. Vegna fjöldatakmarkana er nauðsynlegt að bóka sig hér eða hringja í síma 530 2202. Grímuskylda og 2 metra reglan gildir á safninu. Fyrirlestrinum verður einnig streymt í gegnum YouTube rás safnsins.
Á hverju ári berst töluvert magn af jarðfundnum gripum og gögnum úr fornleifarannsóknum til Þjóðminjasafns Íslands. Rannsóknirnar eru mismunandi að umfangi og eðli. Aðföngin eiga það þó sameiginlegt að þau gegna veigamiklu hlutverki í að varpa ljósi á menningu og sögu þjóðarinnar frá landnámi til dagsins í dag. Eitt af hlutverkum Þjóðminjasafns Íslands er að varðveita og miðla þessum gögnum og gripum.
Í fyrirlestrinum fá gestir að skyggnast á bak við tjöldin þar sem innra starf safnsins verður í fyrirrúmi. Þá verður farið yfir sérstöðu fornleifafræðilegra gagna innan veggja safnsins og fjallað verður um nokkrar af þeim rannsóknum sem afhentar voru safninu árið 2020 og sagt frá áhugaverðum gripum þeim tengdum. Ennfremur verður greint frá gangi afhendingar gagna en töluverður árangur hefur náðst í afhendingu eldri rannsókna til safnsins.
Aðgöngumiði í safnið gildir. Ókeypis fyrir handhafa árskorts og ókeypis fyrir börn að 18 ára aldri. Árskort kostar 2.000 kr. og gildir á allar sýningar og viðburði í Þjóðminjasafni Íslands.
Verið öll velkomin.