Brasilíufararnir - Hreyfanleiki og hnattræn tengsl fólks á 19. öld
Þriðjudaginn 14. mars kl. 12 flytur Eyrún Eyþórsdóttir mannfræðingur erindi í fyrirlestrasal Þjóðminjasafns Íslands.
Á árunum 1863 og 1873 settust tæplega 40 Íslendingar að í suðurhluta Brasilíu. Búferlaflutninga þeirra verður að skoða í stærra samhengi hreyfanleika fólks og hnattrænna tengsla á 19. öld en áætlað er að yfir 50 milljónir manna hafi flust frá Evrópu og sest að annars staðar á tímabilinu. Athyglisvert er að skoða fréttaflutning frá meginlandi Evrópu í tímaritum hérlendis um búferlaflutningana, meðal annars til Brasilíu, og velta fyrir sér áhrifum þessa á ákvörðun Brasilíufaranna. Efni fyrirlestursins byggir á doktorsrannsókn Eyrúnar í mannfræði við Háskóla Íslands um Brasilíufarana og afkomendur þeirra í samtímanum.
Fyrirlesturinn er fjórði í röð hádegisfyrirlestra Þjóðminjasafnsins á vormisseri og er skipulagður í tengslum við sýninguna Ísland í heiminum, heimurinn í Íslandi.