Fyrirlestur: Dánarbú frá 19. öld: hvað var skráð og hvað ekki?
Þriðjudaginn 15. nóvember næstkomandi klukkan 12:00 mun Már Jónsson, prófessor í sagnfræðideild Háskóla Íslands, vera með hádegiserindi í fyrirlestrarsal Þjóðminjasafnsins. Fyrirlestrum safnins er streymt beint á YouTube-rás Þjóðminjasafnsins.
Til eru gögn um eftirlátnar eigur nærri þrjátíu þúsund Íslendinga frá miðri 18. öld til loka 19. aldar. Þar er hafsjór upplýsinga um það sem fólk af öllum stigum nýtti í daglegu amstri og á heildina litið mætti ætla að að unnt sé að endurskapa efnislegar eigur landsmanna eftir aldri, kyni og stétt.
Hins vegar getur það gerst, þegar farið er í saumana á einstökum skjölum, að gloppur birtist eða eyður um til dæmis fatnað eða búsmuni. Hvað er þá til ráða?
Þriðjudaginn 15. nóvember næstkomandi klukkan 12:00 mun Már Jónsson, prófessor í sagnfræðideild Háskóla Íslands, vera með hádegiserindi í fyrirlestrarsal Þjóðminjasafnsins, þar sem þetta verður gert að umtalsefni og spurt hvort nokkuð sé að marka þessa pappíra?
Tilefni erindisins er sýningin Heimsins hnoss: Lúinn kistill, silfurskeið og nærbuxur (með gati) sem var opnuð 5. nóvember síðastliðinn í Bogasal Þjóðminjasafns Íslands.
Sýningin teflir saman upplýsingum um dánarbú sem varðveittar eru í Þjóðskjalasafni Íslands og gripum úr munasafni Þjóðminjasafnsins með það að markmiði að varpa ljósi á efnisheim fólks á 18. og 19. öld.
Árið 2018 hlaut rannsóknarverkefnið Heimsins hnoss: Söfn efnismenningar, menningararfur og merking öndvegisstyrk frá Rannís. Að verkefninu stóð hópur hug- og félagsvísindafólks við Háskóla Íslands sem vann að því í samstarfi við erlenda sérfræðinga víða um heim. Rannsóknin fólst í því að varpa ljósi á efnislegar eigur fólks á síðari öldum og velta því fyrir sér hvernig þessir hlutir mynda menningararf íslensku þjóðarinnar í dag. Tvö ólík söfn um eigur fólks frá fyrri tíð lágu til grundvallar rannsóknarverkefninu. Annars vegar skjöl með upp skrifuðum dánarbúum Íslendinga í Þjóðskjalasafni Íslands og hins vegar munasafn Þjóðminjasafns Íslands.
Hádegisfyrirlestraröð Þjóðminjasafns Íslands
Fyrirlestrar Þjóðminjasafns Íslands tengjast sýningum, rannsóknum eða öðru starfi safnsins. Fyrirlestrum safnins er streymt beint á YouTube rás Þjóðminjasafnsins.
Aðgöngumiði í Þjóðminjasafnið kostar 2.500 kr. fyrir fullorðna og gildir í eitt ár en frítt er fyrir börn yngri en 18 ára. Það er því nægur tími fyrir alla til að njóta þess sem safnið hefur upp á að bjóða. Verið velkomin eins oft og þið viljið. Aðgöngumiðinn gildir að öllum sýningum og viðburðum á vegum safnsins.