Hvammur á Völlum, á 12. stundu
Sigurbjörn Ingvarsson, meistaranemi við Listkennsludeild Listaháskóla Íslands, segir frá yfirstandandi verkefni sem tengist Jóni Sigvaldasyni og baðstofunum hans austur á Hvammi á Völlum.
Jón var húsasmíðameistari, lærður í Kaupmannahöfn rétt fyrir aldamótin 1900, og tók þátt í síðasta byggingarskeiði torfbæjarins í kringum 1920-30. Fyrirlesturinn er í hádegisfyrirlestraröð Þjóðminjasafns Íslands og kallast á við sýninguna Á elleftu stundu sem stendur yfir í Myndasal og veitir innsýn í umfangsmikla og ómetanlega skráningu torfbæja hér á landi á áttunda áratug 20. aldar. Hvammur á Völlum er að hruni kominn og mikil þörf er á að gera húsinu skil í teikningu og uppmælingu áður en það hverfur aftur til jarðar.
Síðasta byggingastigið á Hvammi var tvílyft timburhús byggt í tótt eldri torfbaðstofu. Sérstaða þessarar húsagerðar er háar hleðslur á gafli sem nær allt að 5 metrum og spurning var hvort um torf- eða timburhús var að ræða. Hörður Ágústson fornhúsafræðingur hefur haft þau orð um þetta byggingarskeið að þá hafi timburhúsin verið að vaxa út úr torfbyggingunum.
Fyrirlesturinn fer fram 25. október klukkan 12:00 í fyrirlestrasal safnsins og verður einnig í beinu streymi á YouTube rás safnsins. Aðgöngumiði í safnið gildir. Ókeypis fyrir handhafa árskorts og ókeypis fyrir börn að 18 ára aldri. Árskort kostar 2.500 kr. og gildir á allar sýningar og viðburði í Þjóðminjasafni Íslands.