Fyrirlestur: Vísnabókin
Anna Þorbjörg Ingólfsdóttir, lektor við Háskóla Íslands verður með hádegisfyrirlestur í Þjóðminjasafni Íslands þriðjudaginn 24. nóvember þar sem hún fjallar um sögu og gildi Vísnabókarinnar. Bókin hefur sérstöðu meðal íslenskra barnabóka og Anna Þorbjörg veltir upp spurningum um framtíð hennar í þeim ríka myndheimi sem nútímabörn alast upp við.
Allt frá því að Vísnabókin kom fyrst út árið 1946, eða í nærri sjötíu og fimm ár, hefur hún notið mikilla vinsælda og hefur margsinnis verið endurútgefin, nú síðast á þessu ári. Myndir Halldórs Péturssonar eiga ríkan þátt í vinsældum bókarinnar og unnendur bókarinnar eiga sér þar flestir einhverja uppáhaldsmynd. Bókin varðveitir og miðlar hluta af menningararfi íslensku þjóðarinnar og sjálf er hún líka orðin hluti af þeim sama arfi. Vísnabókin býr enn yfir þeim galdri að sameina kynslóðir og þess er jafnan gætt að ungar fjölskyldur eignist þessa bók fyrir börnin sín.
Vísnabókinni eru gerð sérstök skil á yfirlitssýningunni Teiknað fyrir þjóðina – Myndheimur Halldórs Péturssonar sem er í Myndasal. Vegna samkomutakmarkanna er safnið enn lokað en þegar safnið opnar á ný hvetjum við gesti til að sækja þá einstöku sýningu.
Fyrirlestrinum verður streymt og fluttur í gegnum Teams livestream . Fyrirlesturinn verður einnig tekinn upp og birtur á Youtube rás Þjóðminjasafnsins.