Kynþáttafordómar og þjóðarímynd
Sunnudaginn 21.maí klukkan 14 mun Kristín Loftsdóttir prófessor í mannfræði leiða gesti um sýninguna Ísland í heiminum, heimurinn í Íslandi. Kristín sem er annar sýningarhöfundanna mun leggja áherslu á kynþáttafordóma og þjóðarímynd í leiðsögninni. Allir velkomnir og ókeypis aðgangur.
Ísland í heiminum, heimurinn í Íslandi
Saga og samtími Íslands hefur einkennst af þverþjóðlegum tengslum rétt eins og annarra landa í heiminum. Ísland hefur þannig verið vettvangur hreyfanleika fólks og hugmynda í gegnum aldir.
Þetta er mikilvægt að undirstrika á tímum þegar dagleg umræða byggir oft á þeirri hugmynd að fyrr á öldum hafi ólíkir hlutar heimsins verið einangraðir hverjir frá öðrum. Fordómar í íslensku samfélagi eru ekki heldur nýir því að Íslendingar hafa um aldir verið mótaðir af hnattrænum hugmyndum um kynþáttafordóma.