Leiðsögn: Lilja Árnadóttir, sviðstjóri munasafns
Þann 14. apríl kl. 14 mun Lilja Árnadóttir sviðsstjóri munasafns Þjóðminjasafnsins leiða gesti um sýninguna Kirkjur Íslands: Með augum biskups og safnmanna í Myndasal.
Á henni eru ljósmyndir Matthíasar Þórðarsonar fyrrum þjóðminjavarðar, vatnslitamyndir eftir Jón Helgason biskup og Þór Magnússon fyrrum þjóðminjavörð. Sýningin er liður í veglegri dagskrá 100 ára afmælis fullveldis Íslands og Evrópska menningararfsársins 2018 þegar út komu seinustu bindin í bókaflokknum Kirkjur Íslands sem telja 31 bók. Umfjöllunarefni sýningarinnar eru guðshús en viðamikil umfjöllun er um allar friðaðar kirkjur á landinu út frá sjónarhóli byggingarlistar, stílfræði og þjóðminjavörslu. Lilja skrifaði nokkra kafla um gripi og áhöld fyrir ritröðina. Hún mun segja frá störfum frumkvöðlanna í kirkjurannsóknum og að kynna bókaflokkinn.
Sýningin var opnuð í nóvember 2018 og stendur til 21. apríl 2019.
Leiðsögnin fer fram á íslensku og er öllum opin. Verið öll velkomin.