Listi yfir hús í safninu

Víðimýrarkirkja í Skagafirði

Torfkirkjan á Víðimýri var reist árið 1834 af Jóni Samsonarsyni smið og alþingismanni frá Keldudal. Kirkjan er opin gestum 1. júní - 31. ágúst, 9-18 alla daga. Sjá frekari upplýsingar :  http://www.glaumbaer.is/is/safnid

 

Víðimýrarkirkja er opin 9-18 alla daga frá 1. júní til 31. ágúst.
1000 kr. einstaklingar
700 kr. hópar & námsmenn
0 kr. fyrir 17 ára og yngri

Torf kirkjunnar er endurnýjað reglulega en hlutar úr timburklæðningu og innviðir eru að mestu upprunalegir. Vegggrind kirkjunnar er úr bindingsverki og er að innanverðu klædd ómáluðu spjaldaþili. Í lofti er reisifjöl á langböndum.

Líklega hefur kirkja fyrst verið reist á Víðimýri fljótlega eftir kristnitöku í landinu. Samkvæmt elsta máldaga frá um 1318 var kirkja á Víðimýri helguð Maríu guðsmóður og Pétri postula.Víðimýrarkirkja er ein af örfáum torfkirkjum sem varðveist hafa á landinu og er meðal gersema í Húsasafni Þjóðminjasafns Íslands.Innréttingar Víðimýrarkirkju bera vitni um rótgróna hefð í sætaskipan íslenskra kirkna eftir siðbreytingu. Karlmenn sátu sunnanvert, heldri menn í kór en konur norðanvert, þær heldri í stúku.
Ýmsir gamlir munir eru í kirkjunni, sumir úr eldri kirkjum á staðnum. Altaristaflan, með ártalinu 1616, er líklega dönsk að uppruna og sýnir miðmyndin síðustu kvöldmáltíðina. Á íslensku er textinn undir altarisbríkinni svohljóðandi: „Svo oft sem þér etið þetta brauð og drekkið af bikarnum, boðið þér dauða Drottins, þangað til hann kemur.“ (1. Kor. 11:26).
Prédikunarstóll kirkjunnar er líklega frá 17. öld og eru myndir á honum mjög illa farnar af tímans tönn. Þær sýna Krist í miðju og guðspjallamennina til beggja hliða.

Sáluhliðið er frá 1936 en klukkur kirkjunnar eru báðar frá árinu 1630. Margir af eldri gripum Víðimýrarkirkju eru nú varðveittir á Þjóðminjasafni Íslands.
Kirkjan hefur verið hluti af húsasafni Þjóðminjasafns Íslands frá 1936.

Í upphafi 20. aldar var tvísýnt um afdrif Víðimýrarkirkju en Matthías Þórðarson sem þá var þjóðminjavörður hafði forgöngu um varðveislu hennar og sá til þess að hún komst í umsjá Þjóðminjasafnsins.

Utan sumartíma má skoða kirkjuna í samráði við staðarhaldara, Einar Örn Einarsson (s. 849-5674 og 453-5095).

Kynningarbæklingur um Víðimýrarkirkju (PDF, 374,8 KB)

Þjóðminjasafnið teygir anga sína víða um land. Í Húsasafni þess eru gömul hús og byggingar af ýmsu tagi. Farið er með húsin líkt og "safngripi" og áhersla lögð á að varðveita þau í sínu rétta umhverfi. Viðgerðir standa yfir á sumum húsanna en önnur eru alla jafna opin almenningi á sumrin, meðal nokkurra á Norðurlandi má nefna torfbæina Glaumbæ í Skagafirði, Nýjabæ á Hólum og Laufás í Eyjafirði, Grafarkirkju á Höfðaströnd, Pakkhúsið í Hofsósi og Klukknaportið á Möðruvöllum. Á Suðurlandi eru til dæmis Húsið og Assistentahúsið á Eyrarbakka, Keldur á Rangárvöllum, Bænhúsið á Núpsstað og Selið í Skaftafelli svo fáein hús í Húsasafni Þjóðminjasafnsins séu nefnd.