Í desember 1947 strandaði breski togarinn Dhoon í aftakaveðri við Látrabjarg. Björgunarsveitarmenn frá Hvallátrum og Patreksfirði unnu frækilegt afrek við björgun 12 skipbrotsmanna við ógnvekjandi aðstæður og hlutu verðskuldaðan heiður fyrir, heima og erlendis.

Ljósmyndir Sigurjóns Péturssonar og Þóru Hrannar Njálsdóttur sem sækja innblástur sinn í bók Gunnars Gunnarssonar Aðventu um ævintýri Fjalla-Bensa.

Á sýningunni eru svokallaðir módelkjólar sem saumaðir voru eftir pöntun og ýmsir fylgihlutir eins og skór, hattar, hanskar og undirföt. Kjólarnir eru listaverk, sumir látlausir og einfaldir aðrir tilkomumiklir og glæsilegir, kjólar sem pössuðu við konuna og tilefnið. Sýningarhöfundur er Steinunn Sigurðardóttir fatahönnuður, en með einstakri innsýn sinni í tískustrauma 20. aldar tekst henni að glæða kjólana á sýningunni nýju lífi. 

Skákeinvígið sem kallað hefur verið „einvígi aldarinnar“ var háð í Reykjavík sumarið 1972. Þar tókust á fulltrúar risaveldanna á tímum „Kalda stríðsins“, Bandaríkjamaðurinn Bobby Fischer og sovéski heimsmeistarinn Boris Spassky. Í tilefni þess að í ár eru liðin 40 ár frá einvíginu má sjá sýninguna Einvígi aldarinnar. Fischer og Spassky – 40 ár í Horni á 2. hæð í Þjóðminjasafni Íslands. Á sýningunni eru munir og myndir sem tengjast skákeinvíginu 1972.

Þjóðminjasafn Íslands vinnur um þessar mundir að söfnun upplýsinga um heimili á Stúdentagörðum. Tilgangurinn er að kanna hvernig heimili á Görðunum eru samsett, hvaða munir og húsgögn rata inn á þau, hvernig fólk skapar sér heimili, upplifir það og stundar í daglega lífinu. Spurningskráin er hluti af meistaraverkefni Sigrúnar Hönnu Þorgrímsdóttur í þjóðfræði við Háskóla Íslands.