Ljósmyndasafn Íslands

Ljósmyndasafn Íslands

Hlutverk Ljósmyndasafns Íslands er að safna, skrá og varðveita ljósmyndir, glerplötur, filmur, skyggnur og önnur gögn er tengjast ljósmyndum. Ljósmyndir eru stærsti efnisflokkurinn í Þjóðminjasafni Íslands og eru um 6,5 milljónir mynda í safninu, bæði úrval þjóðlífs- og mannamynda frá upphafi ljósmyndunar 1839 og fram yfir aldamótin 2000 en líka besta varðveitta úrval teiknaðra og málaðra manna- og þjóðlífsmynda frá Íslandi frá 16.-19. öld. 

Ljósmyndasafn Íslands veitir almenningi, sérfræðingum, útgefendum, kvikmyndagerðarmönnum og öðrum aðgang að myndasöfnum í sinni vörslu og selur og leigir eftirtökur eftir myndum sem varðveittar eru í safninu. Um 940.00 myndir eru leitarbærar í skráningarkerfinu www.sarpur.is. Hluti þeirra eða rúmlega 90.000 myndanna er aðgengilegur almenningi til skoðunar þar. Annar hluti er ekki til á stafrænu formi eða bara á frummyndum og veita starfsmenn safnsins aðstoð við leit að öðru myndefni.

Myndir í ljósmyndasafninu eru flokkaðar niður í nokkrar einingar eftir uppruna og gerð. Fimm undirsöfn eru í safninu. Mannamyndasafnið inniheldur rúmlega 55 þúsund ljósmyndir, en byrjað var að safna til þess árið 1908 og markar það upphaf ljósmyndasöfnunar hér á landi. Ljós- og prentmyndasafnið inniheldur um 32 þúsund myndir, en byrjað var að safna til þess árið 1915. Póstkortasöfn eru þrjú í safninu og innihalda um 14 þúsund kort. Filmu- og plötusöfn eru 227 í safninu bæði frá atvinnuljósmyndurum, ljósmyndastofum og áhugamönnum og barst það fyrsta til safnsins árið 1915. Filmu- og plötusöfnin eru mjög misstór sum með innan við 10 myndir en önnur með um milljón myndir en alls eru um fjórar milljónir mynda í þeim öllum. Myndasöfn eru alls 50safninu eins og til dæmis safn Morgunblaðsins, Sambands íslenskra samvinnufélaga og Ríkisútvarpsins-Sjónvarps.

Safnið tekur við og varðveitir efni frá stofnunum og einkaðilum sé þess óskað.

Ljósmyndasafn Íslands er með aðsetur í Vesturvör 16-20 í Kópavogi og er skrifstofa þess opin alla virka daga frá kl. 8:00 - 16:00.