Fjölskyldan

Komdu í heimsókn með alla fjölskylduna

Eitt af markmiðum Þjóðminjasafnsins er að safnkosturinn sé gestum til fróðleiks, skemmtunar og örvunar. Heimsókn í Þjóðminjasafnið er því bæði skemmtileg og fræðandi fyrir alla fjölskylduna. Hægt er að ganga að vandaðri fræðslu um íslenskar þjóðminjar frá landnámi til nútímans, hvort sem hún fæst gegnum sígilda leiðsögn frá starfsmönnum safngæslu, hljóðleiðsögn, sérfræðileiðsögn eða með öðrum hætti. Einnig er hægt að fara í gegnum safnið með hjálp tilbúinna leiðsagna sem fást í afgreiðslu. 

Barnaleiðsögn

Fyrsta sunnudag í hverjum mánuði yfir vetrartímann er boðið upp á sérstaka barnaleiðsögn. Þá gengur safnkennari með gesti um sýningar safnsins og segir frá áhugaverðum og skemmtilegum gripum. Meðal þess sem er skoðað er 800 ára gamall skór, dularfullur álfapottur, gömul hurð með fallegum myndum (Valþjófsstaðahurðin), beinagrindur, hringabrynja, galdramunir og margt fleira. Stundum er brotið út af vananum og sérsýningar safnsins skoðaðar eða ákveðin þemu. Best er að fylgjast með safninu á samfélagsmiðlum eða skrá sig á póstlista til að fá fréttir um dagskrána hverju sinni.Grunnsyning_20160904_barnaleidsogn_ARG_17Sérstök fræðslurými og skemmtilegt fræðsluefni eru aðgengileg fyrir alla aldurshópa bæði í Safnahúsinu við Hverfisgötu og í Þjóðminjasafninu við Suðurgötu, fjölskyldum að kostnaðarlausu.   

Farðu með fjölskylduna í ferðalag um íslenskan myndheim í Safnahúsinu við Hverfisgötu

Safnahúsið fjölskyldur

Fræðsluefni Safnahússins miðar að því að leikur og sköpun séu grunnur náms. Fræðsla er samofin sýningunni Sjónarhorn á margvíslegan hátt og á sýningunni er fræðsluefni sem býður upp á leik og hvetur til skapandi hugsunar um verk og inntak sýningarinnar. Auk þess eru fræðslurými í Safnahúsinu þar sem sýningagestir geta skoðað, leikið og slakað á. Heimsókn í Safnahúsið er tilvalið tækifæri til samverustundar eldri og yngri kynslóða og fræðsluefnið er hugsað sem samvinnuverkefni fyrir börn og fullorðna.

Börn á safniSkemmtimentun

Fyrir börnin í Þjóðminjasafninu við Suðurgötu

Á annarri hæð Þjóðminjasafnsins er herbergi ætlað börnum og fjölskyldum þeirra. 

Þar eru búningar frá ýmsum tímabilum sem öllum er frjálst að prófa. Þar er hægt að smeygja sér í hjálm frá víkingatímanum og prófa sverð og skjöld. Þar má einnig finna hversu þung hringabrynja og hjálmur eru. 

Einnig er þarna gömul ritvél og sími og líkan af miðaldakaupstaðnum á Gásum í Eyjafirði. Í sögukompunni er hægt að lesa bækur og hlusta á þjóðsögur á íslensku og ensku.

Ratleikir í Þjóðminjasafninu við Suðurgötu

Ratleikir Þjóðminjasafnsins eru góð leið til að kynnast grunnsýningu safnsins á léttan og líflegan hátt. Ratleikirnir henta allri fjölskyldunni og er sérstaklega gaman að leysa þrautirnar saman.  

RatleikirHægt er að nálgast ratleikina í móttöku Þjóðminjasafnsins á Suðurgötu. Umfjöllunarefni þeirra eru margbreytileg:

 

  • Þrautaleikur um Þjóðminjasafn
  • Mældu, teldu, teiknaðu!
  • Furður úr fortíð
  • Börnin í gamla daga
  • Á þeysireið um Þjóðminjasafn

Einnig er í boði ratleikur á fimm erlendum tungumálum, á ensku, frönsku, spænsku, dönsku og þýsku.

Í desember er boðið upp á sérstakan jólakattarratleik, en þá býðst gestum að leita uppi jólaköttinn sem hefur falið sig víðsvegar um safnið.

Aðgangur er ókeypis fyrir börn 18 ára og yngri, bæði á Þjóðminjasafnið við Suðurgötu og í Safnahúsið við Hverfisgötu. Verið velkomin.

Minningaherbergið

Á annarri hæð grunnsýningarinnar er svokallað minningaherbergi. Í því er hægt að fræðast um tímabilið 1955-1965, skoða myndir, snerta gripi og hlusta á tónlist frá þeim tíma. Herbergið er meðal annars notað í minningavinnu með eldri borgurum.

Minningarherbergi