Sýningin Brot úr framtíð í Bogasal Þjóðminjasafns Íslands byggir á listrannsókn og myndlistarverkefni Þorgerðar Ólafsdóttur þar sem hún veltir fyrir sér fyrirbærum tengdum mannöld og hugmyndum okkar um menningar- og náttúruarf.

Í tilefni 80 ára afmælis lýðveldisins er nemendum framahaldsskóla boðið í heimsókn í Þjóðminjasafnið að skoða sérsýningarnar Þjóð í mynd: Myndefni frá stofnun lýðveldis 1944 og Lögréttutjöldin með safnkennara. Skoðun á grunnsýningu safnsins er fléttað inn í heimsóknina, einkum tímabilinu 1800 - 2000.

Almenn leiðsögn um grunnsýningu Þjóðminjasafnsins, Þjóð verður til, er ávallt í boði fyrir alla aldurshópa. 

Farið er yfir fyrri helming grunnsýningar safnsins, þar sem fjallað er um sögu Íslandsbyggðar frá landnámi og fram yfir siðaskipti. 

Seinni hluti grunnsýningar safnsins er kannaður, þar sem fjallað er um sögu Íslandsbyggðar frá siðaskiptum til nútímans. 

Gengið er um grunnsýningu safnsins með áherslu á gripi sem tengjast íslenskri bókmenntasögu frá upphafi Íslandsbyggðar til nútímans. 

Víða á grunnsýningu safnsins má sjá muni og myndir sem varpa ljósi á fatnað og tísku fyrri alda. Skoðaðar eru textílleifar, skartgripir, myndir og minningartöflur sem gefa innsýn í efni og útlit fatnaðar fyrri alda. Tískustraumar frá Evrópu höfðu áhrif á fatagerð hér á landi þó sum stílbrigði megi telja séríslensk. Þróun íslenskra kvenbúninga verður sérstaklega höfð að leiðarljósi sé þess óskað. 

Grunnsýning safnsins er rannsökuð með sérstakri áherslu á handverk og listir. Skoðaðir eru kirkjugripir, nytjagripir og listgripir á sýningunni og þeir settir í samhengi með tilliti til samfélagsgerðar hverju sinni. 

Regnbogaþráðurinn er hinsegin vegvísir í gegnum sýninguna Þjóð verður til - menning og samfélag í 1200 ár. Í honum er fjallað um hinsegin sögu á Íslandi. Með hugtakinu hinsegin er átt við kyn og kynverund sem samræmist ekki hefðum og venjum hvers tíma, þar á meðal fólk sem í dag væri kallað trans, intersex, kynsegin, samkynhneigt, tví-, pan- eða eikynhneigt.

Þráðurinn var unninn í samvinnu við Samtökin '78.

Hvernig er hægt að vekja áhuga ungs fólks á samfélagi, listum og náttúru í gegnum söfn? Hvernig má nýta safnheimsóknir til að hvetja nemendur til sjálfstæðra vinnubragða og túlkunar?