Unglingastig: Regnbogaþráðurinn, hinsegin vegvísir um grunnsýningu Þjóðminjasafnsins

Smellið hér til að bóka heimsókn

Markmiðið með Regnbogaþræðinum er að miðla upplýsingum um hinsegin líf og tilveru, sýna hvernig hugmyndir um kyn og kynhneigð taka á sig ýmsar myndir á ólíkum tímum og ekki síst að spyrja spurninga, skoða hið ósagða og hvetja gesti til gagnrýninnar hugsunar. Dagskráin er einkum ætluð nemendum á unglingastigi og framhaldsskólastigi. Heimsóknin tekur um klukkustund.

Ath.: Fyrir nemendur sem ekki komast í safnið, eða til upprifjunar eftir heimsókn, er hljóðleiðsögnin einnig aðgengileg á vef safnsins hér.

Hæfniviðmið og menntagildi

Menntagildi samfélagsgreina eins og það er útskýrt í Aðalnámskrá grunnskóla er haft að leiðarljósi:

1) Hæfni nemanda til að skilja veruleikann (umhverfið, samfélagið, söguna og menninguna), sem hann hefur fæðst inn í, byggist á þeirri reynslu sem hann hefur orðið fyrir. Samfélagsgreinar eiga að efla þessa hæfni með því að víkka út og dýpka reynsluheim nemandans.

2) Hæfni nemanda til að átta sig á sjálfum sér byggist á því hvaða mynd hann gerir sér af sjálfum sér (og öðrum) í eigin huga. Samfélagsgreinar eiga að efla þessa hæfni með því að víkka út og dýpka hugarheim nemandans.

3) Hæfni nemanda til að mynda og þróa tengsl sín við aðra byggist á þeim félagsskap sem hann hefur tekið þátt í. Samfélagsgreinar eiga að efla þessa hæfni með því að virkja nemandann til þátttöku í félagsheimi sínum, þeim gildum og reglum sem þar ríkja. (Bls. 195).

Færi gefst á að þjálfa m.a. eftirfarandi hæfniviðmið samfélagsgreina skv. Aðalnámskrá í heimsókninni: Nemandi geti;

- sýnt fram á skilning á mikilvægi þess að bera virðingu fyrir sjálfum sér og öðrum, fyrir mannréttindum, félagslegu réttlæti, jöfnuði og helgi mannlegs lífs,
- grundað víxlverkun samfélags, stjórnmála, náttúru, trúar og lífsviðhorfa í tímans rás, í samhengi nærsamfélags og hnattvæðingar,
- rökrætt mikilvæg hugtök, sem notuð eru um menningar- og samfélagsmálefni,
sýnt fram á þekkingu og gagnrýna sýn á tímabil, atburði, persónur, menningartengsl og þróunarferla á ýmsum tímum, sem vísað er til í þjóðfélagsumræðu,
- gert sér grein fyrir hlutverki og margbreytileika fjölskyldna og gagnkvæmum áhrifum innan hennar á mismunandi tímum og menningarsvæðum,
- beitt hugtökunum kyn, kynhneigð og kynhlutverk og útskýrt hvaða hlutverki þau þjóna í kyngervi einstaklinga og sjálfsmynd,
- gert sér grein fyrir jafngildi sínu og annarra manna og útskýrt fyrir öðru fólki mikilvægi þess,
sett sig í spor fólks með ólíkan bakgrunn og viðhorf, á ýmsum stöðum og tímum (bls. 198-203).

Kennsluverkefni

Upplagt er að fá nemendum einfalt verkefni til að standa skil á heimsókninni. Til dæmis má biðja þá um að skrifa niður nokkur atriði svo sem:

• Það sem kom mér mest á óvart 
• Það sem ég vil vita meira um
• Það sem vantar í frásögnina í Regnbogaþræðinum

Fyrirkomulag heimsóknar

Regnbogaþráðurinn er hljóðleiðsögn eða bæklingur sem leiðir gesti í gegnum grunnsýningu safnsins. Til þess að hlusta á hljóðleiðsögnina mæta nemendur með eigin snjallsíma og heyrnartól. (Það er líka hægt að fá lánað ef þörf krefur). Þegar á safnið er komið tekur safnkennari á móti hópnum og kynnir Regnbogaþráðinn með nokkrum orðum. Nemandinn tengist inn á gestanet Þjóðminjasafnsins og velur hljóðleiðsögn um Regnbogaþráðinn. Þráðurinn beinir gestinum að ellefu vörðum eða stöðum á grunnsýningunni þar sem staldrað er við og hlustað á fræðslu sem tengist efninu út frá viðkomandi stað á grunnsýningunni. Nemandinn styðst við kort af grunnsýningunni í símanum sínum, auk þess sem hver staður er merktur með límmiða með mynd af heyrnartólum í regnbogafánalitunum. Nemandi getur líka valið að hlusta ekki heldur styðjast við bækling með sama texta og lestinn er upp í hljóðleiðsögninni. Bæklingurinn liggur frammi í móttöku safnsins og nemendurnir mega taka eintak og nýta það í náminu.

Heimsóknin tekur um 60 mínútur. Æskilegt er að ekki séu fleiri en 25 nemendur í hverjum hópi til þess að þau njóti heimsóknarinnar sem best. Heimsóknir skólahópa eru ókeypis.

Þráðurinn var unninn í samvinnu við Samtökin '78.

Smellið hér til að bóka heimsókn