Leikskólar

Þjóðminjasafn – hvað er það?

Dagskráin er ætluð 4 - 6 ára börnum. Leitast er við að gera safnheimsóknina að skemmtilegri og ævintýralegri upplifun.

Markmið heimsóknar

  • Að börnin kynnist hugtökunum safn og sýning
  • Að börnin upplifi Þjóðminjasafnið sem áhugaverðan stað til að heimsækja
  • Að börnin tengi gripi í safninu við daglegt líf áður fyrr og í samtímanum

Fyrirkomulag heimsóknar

Tekið er á móti hópnum í anddyri safnsins. Börnin hengja upp útifatnað í fatahengi í kjallara. Hópurinn sest á bekk í anddyri þar sem safnkennari býður börnin velkomin, kynnir fyrir þeim dagskrá heimsóknarinnar og veltir upp ýmsum spurningum eins og hvað sé eiginlega geymt í Þjóðminjasafninu.

Safnkennarinn leiðir hópinn um grunnsýningu safnsins, Þjóð verður til, þar sem ýmsa forvitnilega gripi er að sjá. Sumum gripum á safninu fylgja ævintýralegar sögur sem börnunum eru sagðar. Styttum og líkneskjum á sýningunni er gefinn sérstakur gaumur og farið í leik þar sem hermt er eftir styttunum.

Við einn sýningaskápinn setjast börnin í hring og fá að handleika eftirgerð af gripnum í skápnum.

Í lok heimsóknar er börnunum boðið til Stofu en það er aðstaða fyrir dægradvöl, þar sem eru leikföng, bækur og búningar.

Heimsóknin tekur um 45 mínútur. Dagskráin er ætluð 4 - 6 ára börnum.  Æskilegt er að ekki séu fleiri en 15 börn í hverjum hópi til þess að þau njóti heimsóknarinnar sem best.

Bókun skólahópa í leiðsögn í Þjóðminjasafninu á Suðurgötu fer fram í gegnum bókunarsíðu safnsins.