Húsasafn
  • Grenjaðarstaður

Grenjaðarstaður í Aðaldal

Opið 1. júní - 31. ágúst, alla daga frá 10 - 18. Fullorðnir:  1200 kr. (Frítt fyrir börn undir 18 ára aldri). Eldri borgarar: 800 kr. Aðgangseyrir fyrir hópa (fleiri en 10) er kr. 800 á mann. Menningarmiðstöð Þingeyinga sér um rekstur Grenjaðarstaða.

Í hópi hinna stóru norðlensku torfbæja er gamla prestssetrið á Grenjaðarstað. Staðurinn var meðal tekjuhæstu kirkjustaða landsins. Í núverandi mynd sinni var bærinn að mestu reistur á síðari hluta 19. aldar og í veggjum hans er aðallega hraungrýti úr nágrenninu. 

Hugsanlegt er að kunnur forsmiður á sinni tíð, Árni Hallgrímsson frá Garðsá, sé höfundur frambæjarhúsanna en minna er vitað um bakhúsin. Í nyrsta bæjarhúsinu var starfrækt pósthús á síðari hluta 19. aldar og fram yfir aldamótin 1900. Bærinn þótti reisulegastur allra bæja í héraðinu og allt að þrír tugir manna voru þar í heimili. Búið var í gamla bænum fram til 1949.

Bærinn hefur verið í vörslu Þjóðminjasafnsins frá 1954 og skömmu síðar var hafin á honum umfangsmikil viðgerð, þar sem reynt var að færa hann í upprunalegt horf. Þeirri viðgerð lauk 1958, en síðan hefur alloft verið gert við bæinn, enda torfbæir gerðir úr forgengilegum efnum og þeir láta fljótt á sjá þegar ekki er lengur búið í þeim.Grenjadarstadur-1930_Sandvig  Hluti af Byggðasafni Þingeyinga hefur verið í bænum frá árinu 1958.