Háskóli unga fólksins - Drekar og kynjaverur

Þjóðminjasafn Íslands og Árnastofnun bjóða sameiginlega upp á námskeiðið Drekar og kynjaverur - skoðum og skissum í Háskóla unga fólksins, 12. júní frá kl. 9-13.30. Á námskeiðinu fá nemendur m.a. að skissa, skrifa með fjaðurstaf á skinn, skoða spennandi sýningar og útbúa eigin sýningu sem síðar verður sett upp á Þjóðminjasafni Íslands.
‍

Við skoðum og skissum gripi af grunnsýningu Þjóðminjasafnsins, Þjóð verður til. Athyglin beinist að drekum og kynjaverum sem m.a. má sjá í útskornum gripum á sýningunni. Nemendur fá einnig að skoða gripi sem tengjast handritagerð áður en haldið er í Eddu þar sem sýningin Heimur í orðum verður skoðuð. Í handritunum leynast einnig drekar og ýmsar furðuverur sem nemendur fá tækifæri til að nýta í eigin listsköpun. Að lokum setjumst við niður í skrifarastofu þar sem nemendur bregða sér í hlutverk skrifara á miðöldum. Í skrifarastofunni fullvinna nemendur verk sín og fá til þess bókfell (kálfskinn), fjaðurstaf og náttúrublek.
Verk nemenda verða til sýnis í barna- og fjölskyldurými Þjóðminjasafnsins í kjölfarið ásamt ljósmyndum og texta um ferlið að baki gerð verkanna.

Nánari upplýsingar um námskeiðið: https://ung.hi.is/is/drekar-og-kynjaverur-skodum-og-skissum
Skráning á námskeið: https://ung.hi.is/is/namskeid

‍