Safnanótt: Sundlaugamenningu fagnað í tilefni skráningar UNESCO

Í tilefni þess að íslensk sundlaugamenning var nýlega skráð á lista UNESCO yfir óáþreifanlegan menningararf mannkyns blæs Þjóðminjasafnið til sundlaugafagnaðar við upphaf Safnanætur. Um afar þýðingarmikinn áfanga er að ræða, þar sem menningarlegt gildi íslenskrar sundlaugamenningar hefur nú hlotið alþjóðlega viðurkenningu.  

Að baki skráningunni liggur mikil undirbúningsvinna sem var í höndum Þjóðminjasafns Íslands og áður Stofnunar Árna Magnússonar í íslenskum fræðum auk þess sem fjölmargir sundlaugagestir, hópar, félagasamtök og sveitarfélög komu að og studdu tilnefninguna með ýmsum hætti.

Harpa Þórsdóttir þjóðminjavörður, Logi Már Einarsson menningarráðherra og Guðni Th. Jóhannesson fyrrverandi forseti Íslands og velunnari íslenskrar sundmenningar flytja ávörp. Boðið er upp á tónlistaratriði og léttar veitingar, og eru öll velkomin líkt og á aðra dagskrá Þjóðminjasafnsins á Safnanótt.

‍