Þriðjudagsfyrirlestur: Tengsl Íslands og Þýskalands í skugga síðari heimstyrjaldar

Í hádeginu á þriðjudögum býður Þjóðminjasafn Íslands upp á viðburði af ýmsu tagi, svo sem bíósýningar, leiðsagnir, fyrirlestra og stutt málþing.

Þriðjudaginn 24. nóvember, kl. 12-12:45 mun Florian Jacob doktorsnemi í sagnfræði við Humboldt-háskólann í Berlín fyrirlestur um tengsl Íslands og Þýskalands í skugga síðari heimstyrjaldarinnar. Fyrirlesturinn fer fram á íslensku.

Í þessum hádegisfyrirlestri leyfir Florian okkur að skyggnast inn í rannsóknir sínar á hinu örlagaríka tímabili 1933–1945. Fjallað verður um söguleg samskipti landanna tveggja og spennandi heimildaleit í skjalasöfnum. Sérstök áhersla verður lögð á sögu þýska konsúlatsins á Íslandi og velt upp spurningum um leyndardóma fortíðarinnar, meðal annars út frá járnkassa úr konsúlatinu sem margir gestir Þjóðminjasafnsins hafa ef til vill tekið eftir á grunnsýningu safnsins.

Florian Jacob (f. 1995) er menntaður menntaskólakennari og sagnfræðingur og stundar nú doktorsnám við Humboldt-háskólann í Berlín. Doktorsverkefnið fjallar um íslensk-þýsk samskipti á tímum Þriðja ríkisins með aðaláherslu á samskipti ríkjanna á sviðum menningar- og utanríkismála.

Aðgöngumiði í safnið gildir á viðburðinn. Athugið að aðgöngumiði jafngildir árskorti og veitir aðgang á alla viðburði og sýningar á vegum safnsins í ár frá kaupum. Ókeypis er á sýningar og viðburði fyrir börn að 18 ára aldri.