Brúðarbúningurinn: Leiðsögn meistara í kjóla- og búningasaum
Þjóðminjasafn Íslands býður upp á spennandi uppákomur alla sunnudaga yfir vetrar- og vormánuði. Fyrsta sunnudag í mánuði er boðið upp á dagskrá fyrir börn og fjölskyldur, aðra sunnudaga leiðsögn sérfræðinga um sýningar safnsins en síðasta sunnudag í mánuði fer sérfræðileiðsögnin fram á erlendu tungumáli.
Sunnudaginn 18. september kl. 14:00 verður boðið upp á leiðsögn um sýninguna Með sögu í farangrinum – Brúðarbúningurinn. Guðrún Hildur Rosenkjær, sagnfræðingur og meistari í kjóla- og búningasaum, mun ræða handverkið að baki brúðarbúningnum og segja frá helstu uppgötvunum sínum við rannsóknir á búningnum og veita innsýn í saumaskapinn að baki hans.
Einn ríkulegasti kvenbúningur í sögu landsins var lengi talinn hafa glatast í skipsskaða undan ströndum Íslands árið 1809. Síðar kom í ljós að svo var ekki og árið 1963 fannst búningurinn óvænt í safni Viktoríu og Alberts í Lundúnum. Sá fundur markaði tímamót í íslenskum búningarannsóknum.
Guðrún Hildur hefur um árabil helgað störf sín rannsóknum, endurgerð og miðlun íslenskra búninga. Í verkum sínum sameinar hún fræðilega heimildarýni og verklega rannsóknaraðferð þar sem hún endurgerir búninga, efni og vinnuaðferðir til að varpa nýju ljósi á þætti sem ritaðar heimildir einar ná ekki að skýra. Í samstarfi við gullsmiðinn Ásmund Kristjánsson, sem hefur endursmíðað skart búningsins, hefur hún rannsakað brúðarbúninginn í þaula og lagt fram mikilvæga þekkingu á gerð hans og efnivið.
Guðrún hefur jafnframt rannsakað sögu Guðrúnar Skúladóttur, „Blómstranna móður“, sem var annáluð fyrir framúrskarandi saumaskap og eru verk hennar eru varðveitt í Þjóðminjasafni Íslands, en pilsið á brúðarbúningnum á sýningunni er hennar höfundarverk. Í leiðsögninni mun Guðrún Hildur meðal annars segja frá helstu uppgötvunum sínum við rannsóknir á búningnum, veita innsýn í saumaskapinn sjálfan og beina sjónum að samfélagslegri stöðu Guðrúnar Skúladóttur og annarra kvenna á hennar tíma.
Aðgöngumiði í safnið gildir á viðburðinn. Athugið að aðgöngumiði jafngildir árskorti í safnið og aðgangi á alla viðburði og sýningar safnsins gegn framvísun kortsins. Ókeypis er á sýningar og viðburði fyrir börn að 18 ára aldri.
