Auglýsing um kosningahátíð. Forsetakosningar 1968.
Júní 2016
Gripur júnímánaðar tengist forsetakosningum. Gripurinn er auglýsing frá ungum stuðningsmönnum Kristjáns Eldjárns fyrir forsetaframboð hans árið 1968, en hann bauð sig fram gegn Gunnari Thoroddsen það ár.
Í ævisögu Kristjáns má lesa að menn komu að máli við hann, m.a. Eysteinn Jónsson, þegar árið 1967 og hvöttu hann til að bjóða sig fram til forseta, en hann aftók það með öllu. Var þá leitað til annarra sem þótti líklegt að samstaða yrði um, en það var enginn sem tók jákvætt í þá málaleitan. En þeim fjölgaði jafnt og þétt sem hvöttu Kristján til að gefa kost á sér og komu þær óskir úr öllum áttum. Ýmsir hafa verið nefndir sem hvatamenn að framboði hans, en þar má m.a. nefna Jóhannes Elíasson, bankastjóra, Stefán Jóhann Stefánsson, Pétur Benediktsson og Ragnar Jónsson í Smára. Að lokum fór svo að Kristján lét undan þessum mikla þrýstingi og ákvað 17. mars 1968 að bjóða sig fram til forseta.1
Í fyrrnefndri auglýsingu er boðað til kosningahátíðar í Háskólabíói sunnudaginn 16. júní kl. 3 eftir hádegi, en forsetakosningarnar fóru fram 30. júní það ár. Á dagskránni voru m.a. ávörp, þjóðlagaflutningur Ríó Tríós, einsöngur, ljóðalestur og upplestur.
Meðal þeirra sem stóðu að auglýsingunni voru þekkt nöfn eins og Jónatan Þórmundsson, lagaprófessor, Hjörtur Pálsson skáld, Kristbjörg Kjeld, leikkona, Róbert Arnfinnsson, leikari, Baldvin Halldórsson, leikari, Gunnar Eyjólfsson, leikari, Ólafur Vignir Albertsson, píanóleikari og Helgi Pétursson og Ólafur Þórðarson, meðlimir í Ríó Tríói.2
Þá kom fram á fundi með blaðamönnum sem stuðningsmennirnir héldu, að allir væru velkomnir á kosningahátíðina, ungir sem gamlir og að sjónvarpað yrði frá hátíðinni í anddyri Háskólabíós. Á þessum fundi kom einnig fram hjá Ragnari Jónssyni, sem var framkvæmdastjóri framboðsins, að í vikunni á eftir kæmi út blað ungra stuðningsmanna Kristjáns, sem héti Ný kynslóð. Spurt var út í kostnað við kosningabaráttuna og kvað Ragnar hann vera áætlaðan um 2 milljónir króna. Þá sagði Ragnar einnig að engir árekstrar hefðu orðið milli stuðningsmanna frambjóðendanna tveggja í kosningabaráttunni.3
Þjms. 2008-11-14
Már Einarsson
1) Gylfi Gröndal (1991). Kristján Eldjárn: Ævisaga. Forlagið : Reykjavík.
2) Sarpur: http://sarpur.is/Adfang.aspx?AdfangID=314283
3) Morgunblaðið, 14. júní 1968. http://timarit.is/view_page_init.jsp?pageld=1394548