Sýningin Norður/North með ljósmyndum Marco Paoluzzo var opnuð í Myndasal Þjóðminjasafnsins í desember 2005. Marco Paoluzzo er svissneskur ljósmyndari sem hefur á síðasta áratug sérhæft sig í vaxandi mæli í ferðaljósmyndun. Leiðir hans hafa legið víða um heiminn. Helsti vettvangur fyrir myndir hans hefur verið tímarit Hann hefur gefið út ljósmyndabækur frá Shanghai í Kína, Kúbu, Ameríku og Freiburgarsvæðinu í heimalandi sínu Sviss auk tveggja ljósmyndabóka um Ísland. Allar eru þessar bækur með svart hvítum myndum en Marco myndar jöfnum höndum í lit og svart hvítu.

Í Bogasal Þjóðminjasafnsins var opnuð sýningin design.is. Sýningin samanstóð af verkum um 20 íslenskra hönnuða sem staðsett voru í litlum tjöldum, hulduhólum, vítt og breitt um safnið. Sýningarstjórar voru Hrafnkell Birgisson og Sólveig Sveinbjörnsdóttir.

Á haustmánuðum 2005 opnaði Margrét Hallgrímsdóttir þjóðminjavörður sýningu í Myndasal þar sem gat að líta ljósmyndir frá konungskomunni 1907 er Friðrik 8. Danakonungur heimsótti landið. Á sýningunni voru tæplega 60 ljósmyndir úr Reykjavík og af Suðurlandi teknar af Halldóri E. Arnórssyni, Hallgrími Einarssyni, Magnúsi Ólafssyni, Pétri Brynjólfssyni, Vigfúsi Sigurðssyni og óþekktum ljósmyndara. Eru þær í eigu Þjóðminjasafns Íslands og Minjasafnsins á Akureyri.

Ljósmyndasyrpa Haraldar Jónssonar, The Story of Your Life, varpaði ljósi á margbrotið eðli ljósmyndarinnar, náin og um leið flókin tengsl hennar við einstaklinginn, raunveruleikann, umhverfið, tímann, frásögnina og minnið. Við fyrstu sýn gæti virst að það sé verið að skrásetja staði, hversdagsleg atvik og nytjahluti, eða sýna sjálfsævisöguleg minningaraugnablik, án samhengis, eins og einkaljósmyndir frá ókunnugum sem maður skoðar í misgripum fyrir sínar eigin.

Forseti Alþingis, Halldór Blöndal opnaði sýningu á ljósmyndum frá konungskomunni 1907 í Jónshúsi í Kaupmannahöfn sunnudaginn 5. júní. Þjóðminjasafn Íslands hafði veg og vanda af undirbúningi sýningarinnar fyrir Alþingi og Jónshús.

Á rannsóknarsýningunni Fornleifarannsóknir og hin nýja Íslandssaga var níu fornleifarannsóknum Kristnihátíðarsjóðs gerð skil. Á sýningunni voru kynntar þær fornleifarannsóknir sem stóðu yfir árið xxxx með tilstyrk Kristnihátíðarsjóðs og þar mátti sjá úrval gripa sem fundist hafa við uppgrefti. Kristnihátíðarsjóður var stofnaður árið 2000 til að minnast þess að 1000 ár voru liðin frá því kristni var lögtekin á Íslandi og sú mikla gróska sem verið hefur í fornleifarannsóknum á undanförnum árum er ekki síst honum að þakka.

Í Vesturheimi 1955 er heiti á ljósmyndasýningu sem var helguð ljósmyndum Guðna Þórðarsonar blaðamanns og ljósmyndara. Guðni ferðaðist um byggðir Vestur-Íslendinga í Kanada og Bandaríkjunum sumarið 1955 með tilstyrk Alþingis og tók ljósmyndir og kvikmyndir. Hann fór víða um og sótti heim fjölmörg byggðarlög, en myndaði eðlilega mest þar sem Vestur-Íslendingar voru fjölmennastir, eins og á Washington eyju í Michiganvatni, í Minnesota, Norður-Dakota og Nýja Íslandi.

Frú Dorrit Moussaieff opnaði sýninguna og Valgerður Sverrisdóttir ávarpaði gesti.

Reykholt, búskapur og umhverfi var rannsóknasýning um þverfaglegar rannsóknir í Reykholti opnuð. Reykholtsverkefnið var samstarfsverkefni fjölmargra stofnana innanlands og utan um sögu, náttúru, búskap, fornleifar og bókmenntir í Reykholti.

Í Myndasal snemma árs 2005 gat að líta greiningarsýninguna „Hér stóð bær“, þar sem gestir voru beðnir um að hjálpa til við að þekkja bæina á myndunum. Ljósmyndir sem berast myndasafni Þjóðminjasafnsins eru misvel skráðar og þangað berast söfn af filmum sem eru alveg óskráð. Þar á meðal eru margar bæjarmyndir.